تركيبة

" عنده 27 سنه ..وواخد حُكم عسكرى بالسجن 25 سنه  .. حد يا بنتى يمشى فى الشارع ب 6 صناديق ازايز مولوتوف ؟.. ده كلام يصدقه عقل برضه ؟ "  " انا مش جاى اشحت .. انا جاى هنا احل مشكله الرى بأكملها .. المفروض يسمعونى " " مينفعش تاخدى مشكلتى انا كمان ؟"  " مرسى زى حُسنى .. محدش هيعملنا حاجه . .قال بابه مفتوح ولا عارفين نعمل حاجه ولا ندخل ونقابل حد " "انا عندى طفل لازم اربيه وادخله المدرسة .. وانا اتفصلت من شغلى تعسفيا .. مين هيساعدنى ؟" . " يا بيه بياخدوا الورق ويحطوه جوه ..لازم تتدخل وتتكلم وتتأكد "  " انتوا شعب ميطمرش فيكوا الخير ..الراجل ماسك بقاله 3 ايام ...صبرتوا على فساد وظلم 30 سنة .. ومش قادرين تصبروا على الراجل شوية ؟ " . كل فترة والاخرى .. تجد من يتسلق اسوار باب اخضر اللون .. وهناك من يتهمنا .. المصورين .. ان هدفنا تشويه سًمعه المواطنين .. وتشويه سمعه محمد مرسى  .. الرئيس !!  اعداد ليست بالصغيره من عُمال شركه ما .. يهتفون .. ويغنون  .. تعبُر العربات ... بطيئه لان اغلب الناس مش عارفين مين د...

... يومى كان مُتعب  .. مكنتش حابه اروح البيت ..علشان ممشيش فى الشارع .. احيانا اُصاب بالخوف  . ركبت المترو ... حاولت ااقف فى مكان استراتيجى علشان ااقدر اقعد .. وكانت طنط قاعده جنب الشباك .. بينها وبين اللى قدامها ..بنت صغيره .. تعدى ست بتبيع برفان .. فايمان .." البنت الصغيره "..تقول لمامتها انا عايزة منها وتغلب الست ... تقعد تشم كل الازايز  ..وفى الاخر تقول لمامتها ...انا عايزة اللى لونها بمبى  :).  ..وبعدها تعدى بنت بتبيع ميكياج ... فبالتالى ..ايمان عايزة تشترى روج  .. كانت غلابويه اوى .. مش بتهدى خالص  ولما قعدت .. قعدت جنب ماماتها ...فعدى راجل بيبع بلالين  .. وطبعا ..ياماما  عايزة بلونه  ..فخدت من الراجل واحده ..لونها اصفر ...اقترحت عليها تاخد اللى لونها احمر  .. ولما خدتها قعدت تلعب مع كل الناس بالبلونه .. ولما عدى الراجل تانى ...شاوت عليه ..ماما انا عايزة  :)).. فضيحه ..طلعت الكاميرا بتاعتى .. استأذنت طنط ..انا ممكن اصورها ؟ . قاتلها يا اميان بصى ..طنط هتصورك  .. ل...

 رحلتى اليوميه .. اللى ممكن تعتبرها ..مترو ...ومترو ...وشويه شغل  :)... لما ركبت كالعاده ...حسيت بالانظار كلها متجهه فى اتجاه واحد  ... لم التفت  ..بعدها خدت بالى من البنت اللى معاها سلحفه  :). انبهار الاطفال ... واسأله الكُبار  ... كان احمد ... خايف من السلحفه فى الاول ... مامته شجعته  امسكها مش هاتعملك حاجة ... لما مسكها  "ماما دى مش بتتحرك " ... ولما وصلنا حلوان ..بعد ما السُلحفه قالت عبوكو كلكوا وغمضت عنيها  .. والناس الكبيرة عرفت بكام ؟..وبتاكل ايه ؟.. وبتشتريها منين ؟ ... طنط ماما احمد ... فوتت محطتهم ...علشان ابنها كان مبسوط \ خايف  :D 

وقفت بجبهه ملتصقه بحديد بارد ...فى مترو فارغ ... تستقبل هواء يكاد يكون من عالم موازى  ... لما لفتت انتباهى ..لدرجة انى ااقفل اللى بيونس وحدتى ...قفلت الموسيقى البادرة ..والتفتت لانسانه حيه  ... ابتسامتها ..خلت جوايا صراع  .. اطلع الكاميرا فى التو واللحظة واحتفظ  باقرب ما رأيت ..للطفوله  او  انى اتركها تستمتع .... حتى لا تُرهب من الكاميرا  ... اللى خلص الصراع ...سؤالى ان اردت ان اتذكرها ؟ :). سألتها ...اسمك ايه ؟ ..شيماء ..كانت اجابتها بصوت خجول ..مدافع عن نفسها  ... قولتلها ممكن اصورك .؟..  ...الخجل والدهشه كان تعبير عنيها .. وتكلم عقلها ..ممكن ثوانى ؟ راحت تستأذن مامتها  ..ورجعت قالتلى ماشى  .. ساعتها ندمت ..لآنها بصتلى ..وابتسمت ابتسامه من ينظر اللى كاميرا  حاولت اكلمها ... وانُنسيها وجود الكاميرا  .... تعيش فى بيت يبدو انه يفوح منه المحبه ...من كلامها  لا تعرف ماذا تريد ان تكبر ....ردا على اسخف سؤال يُسأل لطفل ... لكنها تعرف انها تُريد ان تكون سعيده وان تساعد ماما ... ولم ...

يوميين على التوالى ...اشوف نفس الطفل مرة كان بيبيع مناديل ..... عرض يا بيه ..عرض يا هانم .200 منديل ب 2 ج بدل 4 ج .... ويوم .... هولز .يعطر الفم ويذهب الهم ... اليوم الاول ..وعينه كانت بتتلفت حوله ... وخبىً الكيس اللى اطول منه ..وبيجره و كأنه بيجر المٍخله بتاعته . علشان العسكرى ميشفهوش ... وبالرغم انى حاولت اشوف الولد وسط الناس ..ومقدرتش كأنه كان لابس قناع مخفى .. لكن شافه ..وقاله تعال ...تعـــــــــــــــال . وبصوت مذعور حبتيين ... مهزوز شوية ..قاله معايا وصل والله العظيم معايا وصل .... ووقف مستنى افراج اِلاهى .وجه على شكل اغلاق ابواب المترو لكن على ما يبدو ان العسكر ى مكانش عايز يسيبه ...فضل حاجز قفل الباب برجله ومهمته الوحيده على الارض يمسك الولد متلبسا ..... لكن صوت اُموى ...سيبه يا اينى اهو رزقه .. شال رجله اللى كانت مانعه الباب انه يقفل .. ..الولد وشه احمر . خد رزقه .. ووقف جنب الباب علشان ينزل وفتح جيبه وخرج وصل لونه احمر ...فضلت اللقطة دى فى ذاكرتى طويلا . واقف من ضهره ...بيحاول بكل ما اُتى من قوه انه يخفى وشه فى الباب وايد ماسكه المناديل ..وايد ماسكه الوصل الاحمر وكأنه اخر ما ...

انك تتمشى فى الجو التلج علشان يمكن جسمك يتعب شوية . فروحك تستريح شوية .. انك تتمشى على كوبرى قصر النيل متخيل انك هتبقى لوحدك اللى هتستقبل الهوا المُعبأ . بالشجن والقصص اللى تملى مجلدات وناس متعرفهاش وكله جايلك من ناحيه النيل .. لكن تلاقى الحبيبه ..وواقفيين برضه عند نفس العمود اللى من زمن مش كتير شُنق واحد عليه ..واتنشر علشان يقدروا يشيلوا جسمه قبل ما نبدأ نشيل اجساد واجسام و دماء .. بحب العمود . وبكره الحب الاعمى .. اللى مش عارف الألم

كان عندنا مشروع رسم ..فى حديقه الازهر قعدنا نرسم هناك اكتر من شهر ..ونظرا لانى شخص مجتهد .كنت بنزل كل يوم ...اركب المترو لحد العتبه ...اتمشى لحد الجنينه ..ودى كانت مسافه طويله او كاستثناء ..باركب العربية البيجو. كنتى فين يا مدونة ساعه لما الحياه كانت كل يوم مغامرة ؟ المهم .كنت بنزل لابسه جيبه سوده متعوده دايما على البهدله .واى قميص عسول .لازم يكون متعود هو كمان على البهدله ومعايا شنطة ضهر علشان البالته .والالوان وشنطة على كتفى فيها المحفظة والموبايل . والوان برضه ..بس مكانش ينفع تترمى مع الرعاع ا فى شنطة الضهر .وفى ايدى استاند "ومن لا يعرف الاستاند ..هو الشىء اللى بيقف على حيله علشان تحط عليه اللوحة وانت بترسم وده لما بتكون خارج اطار الغرف المغلقه :) و والله المفتوحة كمان " والايد التانيه بتبقى اللوحة...ودى كانت فى ايام قليله ..لأنى فى الغالب بعتمد على طيبه قلب الشعب المصرى وبحط اللوحات عندهم ..فى اى مكان برسم فيه بتلاقى حد قلبه يحن على شكلك المرهق فى العام ودائما ويسمحلك انك تسيب اللوحة عنده :) . وانا بقى ايه ؟ كنت تلميذه مجتهده كنت بنزل كل يوم كل يوم ..وايه الصحيان الصبح ....

فى كلام كتير اوى محبوس جوايا مش عارفه ايه اللى حصل ؟او خلى اليوم ده مختلف انى واذ فجأتن بتكلم وبقول كتير انا كنت لسه فى صدمه محمد محمود .. كان عندى صدمه الا فعل ..مش عايزة اعمل حاجة ولا ااقول حاجه .. وعادى ..ادينى عايشة . .. المهم فى كذا مشاهده عايزة احكى عنها .. حكايه الستتات المنتقبات ..اللى بشوفهم فى المترو وكل مكان .. بحسهم محبوسيين .. وده احساس منى انا ..واكيد ليه دلاله على شخصيتى .يعنى البنت المنتقبه اللى كانت فى المترو وبتقرأ ل د فيل .. بغض النظر عن كرهى للراجل ده .. بس حسيت انها بطريقه ما عايزة تتحرر .وانهاردة فى المترو شفت ست منتقبه بتاكل لب .حسيت انها مش طايقه نفسها ..طبعا انا كان ممكن اشوفها ان النقاب ممنعهاش انها تعمل اللى هيا عيزاه .معرفش ده اللى بشوفه ... حاج تانيه . فى الفن ميدان ..وواضح المجهود راسميين بنات ثوريين . سايبيين تحت كل رسمه ورقه علشان تكتب رأيك .. تخيلوا ان اللى كتب رأيه اول واحد .... كتبه فى نص الصفحه .. مش علشان رغاي ...علشان كتب بخط كبير وبغض النظر انه كان شتيمه ...بس لفت نظرى انه حتى مش عايز يسيب مكان لأى حد هيكتب بعده ليه ؟ يعنى مش بتحترم أراء الناس ول...

الروتين والملل المسيطر على الحياه ..هيقتلنى .. بصحى علشان اروح الشغل ... واخلص شغل علشان اروح انام ... بس علشان اصحى تانى يوم :(.. سىء محزن انى ابقى مليانه على آخرى ..ونفسى افجر ده رسمه كانت او صورة .بس انا اتغيرت ..مش عارفه ايه اللى حصل ؟بس حاسه نفسى اتغيرت .. ومش عارفه اتأقلم مع نفسى الجديدة ..مش عارفه الاقى المزاج بتاعى اللى كان بيخلينى ارسم واصور .. واللى كان بيخلينى نشيطة .. ومنتجه ايه اللى حصل؟ .. انا كنت هاحكى على حاجة .. امبارح كانت فرصه انى اخرج خارج الملل بتاع حياتى ده كان الفن ميدان .. بخلص شغلى انا الساعه 8 كنت هناك 8 وربع تقريبا . و عرفت ان اسكندريلا هيغنوا من 8 ونص قلت كويس ..ااقدر اقعدد لحد 9 ..او حتى 9 ونص .. وبتوتر كحالتى الطبيعيه انى اقعد احسب كل حاجة لازم امشى على 9 ونص ..علشان اوصل حلوان 10 وربع ..يبقى يا دوبك اشترى الحاجت اللى ماما عيزاها ..والحق اروح البيت على 11 وطبعا لازم اعتذر لبابا وهو بيقولى يا بنتى احنا بقيينا فى شتا ..مينفعش المواعيد دى . .لكن اسكندريلا قعدوا وقت طويل على المسرح .زمش بيعملوا حاجة بسبب ان الميكرفونات بايظة وانا اقعد افكر .يعنى حفله مهمه كدة...

عموما ..ودايما انا ببص على الناس ..مش عارفه بدور على ايه ؟ . بس متخيله ان اكتر حاجة غنيه فى الدنيا هو الانسان ..ممكن تشوف 4 او 5 تعبيرات على وش شخص فى ااقل من ساعه .. لكن البنت دى كانت مميزة مش عارفه ليه ؟.. كانت من البنات اللى مش باهره الجمال لكن جذابه جدا .. وبسيطة فى لبسها ومكياجها . ..لكن كان عندها اغرب حسنه ممكن اشوفها .. كانت تحت عنيها بمسافه صغيره .. و مكانتش مجرد نقطه..كانت واخده شكل بيضاوى شوية ..كان شكلها غريب اوى لكن الاغرب ..انها مع حاله الحزن اللى البنت فيها ..وهيا باصه على شباك المترو ...ونظرها مش جايب حتى الحديد . الحسنه دى كانت دمعه .. قعدت افكر شوية ..ايه اللى مزعلها ؟.. هل حركة ايديها ولعب صوابعها بالدبله ..ليه دلاله ؟ .. وفى لحظة تليفونها رن ...وهيا بترد .كانت مبتسمة بس ده خلى الدمعه تقرب من عنيها اكتر .. خلاها جايه من المنبع .مقتدرتش افكر كتير فى مشاكلها لكن افتكرت فكرة كنت بحب اعملها ايام مما كنت فى الكليه ..كانت بتهون عليا شوية ..كنت ااقعد ابص على الناس حواليا ..وكنت بتخيل ان كل دول اكيد عندهم مشاكل وصعاب فى حياتهم ..انا ابسط البسيط . كنت دايما اروح البيت ..مش ...