Jun 29, 2011

البلطجية اللى فى الميدان


مع كل اللى بيحصل ده .....
مش قادرة ما اوصلش امانه وصلتنى امبارح...
اولا تسامحونى على طريقة الكتابه.....مش قادرة افكر كويس.....فهقول اللى هيجى فى دماغى
....روحت ماسبيرو امبارح....
كنت خايفه طبعا انهم يحسوا انى دخيله او يتضايقوا منى....خاصه انى مش هاقدر اعرف نفسى انى صحفية
......لكن طبعا الكاميرا تثير فضول الاطفال....اتعرفت على طفليين ...امين وحسن
.....وقولتلهم طيب انتوا ممكن تعرفونى على الناس؟
.....
علشان عايزة اصورهم كمان ....لما وصلت وبدأت اصور
جه كذا راجل يسألنى انتى مين وبتعملى ايه؟...ولما تصورى هتوصلى الكلام ازاى؟
...واحد وقف يحكيلى الحكاية كلها.....انهم باعوا عفش البيت بناءا على وعد الحكومة
انهم يديلهم شقق...
وقعدوا فى خيم لمده 5 شهور....ولما الحكومة بدأت فى تسليم الشقق
....سلمت 133 واحد.....الاهالى ميعرفوش منهم غير 22 واحد
يعنى مين الباقى دول؟؟؟
.......
وبعديين اكتر حاجة كانت بتألمنى ....ألراجل اللى واقف بيكلمنى ...[يقولى يا استاذه احنا مش بنشحت....ده حقنا
ولو هتوصلى صوتنا....لازم تقولى احنا مش بلطجية ولا طماعيين
.....
احنا مش عايزيين غير حقنا.....واللى وعدونا بيه

وبعديين ....قال جمله غريبه جدا
.... قال انا لحد دلوقتى ما سك نفسى ....لأنى لو فاض بيا ممكن اضر البلد..
...
ولما فكرت لقيتها مش غريبة اوى يعنى.....
الراجل ده كانت فى عينه كرامه وهوا بيقولى متصوريش الناس اللى نايمة ...
وكانت فى عينه قهرة وهو بيقول ...ابنى بيقولى هنرجع بيتنا امتى؟.
.....
الناس دى ليها حق وعايزاه....وانا بكتب ده والميدان مليان.....تعتقدوا الراجل ده راح هناك؟


.......................
وبعديين حب يساعدنى
...ودانى للست اللى جوزها مات فى النيل
...
فى البدايه .... نظرة الحزن.فى عنيها ..... والبنت الصغيريه اللى معاها
وحماتها
...
حكت اللى حصل....انها سابت عزاء جوزها علشان المحافظ نداها ...وقالها تيجى علشان يديها شقه بشكل استثنائى
ولما راحت...... للمحافظ..... اولا يابها قاعده برة اكتر من ساعتيين.....
...ولما دخلت قالها انتى مش مستحقه لشقه...لانك مأجرة....فقالتله حضرتك ااقعد فى الشارع يعنى ولا ايه؟
.....ومعايا بنت صغيريه..وفى واحد جاى فى السكه...
قالها وهوا انتى ضامنه.....حد يقول كدة لواحدة حامل؟؟؟
.......
وبعدين اطلقوا عليهم شائعه انهم خدوا شقه و10 الاف جنيه
....
ولما وداها شقه تتفرج عليها...... قالتلىى انها كانت اوضه..... وحمام بس...والمجارى موجوده جوه
قالتله حضرتك انت لو عندك كلب مش هتقعده فى المكان ده
قلها مش عاجبك ... خلاص
........ وياريت الاعلام ميعرفش حاجة عن الموضوع ده.....وعلى لسانها قالت
ان برنامج 90 دقيقة سجل معاها لكن ......اتمنعوا انهم يزيعوا اللى حصل
.......
وكمان كانت بتقوله ان معاها حماتها.....قالها وانتى مالك بحماتك....حد من ولادها يشيلها بقى
.....
قالتله يعنى الست ابنها لسه ميت....و وابنها مات علشان ناخد شقه
حتى ده مش هناخده
........
انا عرفت مين اللى فى الميدان
............................
تحبوا تعرفوا؟؟
بصوا على الصور
....دى ام الشهيد ومراته وبنته
.....شهيد مماتش على ايد شرطة....لكنه مات علشان نزل يغسل وشه فى النيل....
علشان قفلوا كل الحمامات اللى ممكن يدخلوها
عرفت انا البلطجية اللى فى التحرير









Jun 26, 2011

مش انهيار :)

"...يا أبيض.... يا أسود"
كلمه قرأتها على الحيطة اسفل كوبرى
..
....
وانا متجهه لمركز شباب الجزيرة لحضور ندوة تتكلم عن حال البلد الاقتصادى بعدالثورة..
...
حسيت ان الكلمه موجه لمصر....وللجيش وللشعب فى الثورة.......يا أبيض يا أسود مفيش حلول وسط ....ولا منطقة رماديه.
...
....لما وصلت بدرى... لقيت عدد لا بأس به من الناس.
...
وكان البرنامج....فيلم قصير عن ارض مصر.
...ثم الحديث عن الاقتصاد .. مع الاستاذ وائل جمال وبعدها فرقه غنائيه..
.....
وبغض النظر ان الفيلم بدأ الساعه 7 ونص...والميعاد اللى مكتوب 7
...
لكن البدايه كانت جديدة جدا عليا...... المُنظم بدأ البرنامج....بأن ممكن نغنى النشيد الوطنى.....
ومن غير كورس ... ولا فرقة ولا حاجة..
.....وبدأت همسات..... وانتهت بصوت اعلى قليلا
....لكنها كانت حاجة رائعه ومختلفه.....انا لم اُغنى النشيد الوطنى.... من ايام الثانوية:)...
وبدأ الفيلم..... الفيلم بيتكلم عن أرض مصر......الأرض اللى اتسرقت....
... واللى اعطى ما لا يملك لمن لا يستحق وبسعر بخس كمان
.
.
بيتكلم عن الارض ...اللى ظلمت الناس
.... .هيا جملتيين من الفيلم هاقولها
"
يبقى حرام....ان اللى ممعهوش... يموت...علشان خاطر اللى معاه" ..
... وبدون تعليق
....... " حكموا علينا بالموت واحنا احياء......لازم يتعدموا فى ميدان عام"
.....ودى جمله على لسان واحد من ابطال حرب اكتوبر...... عايش..مع سُكان العالم الاخر
.

...ولما انتهى الفيلم...
. بدأ الاستاذ وائل جمال فى الحديث
.
...
وكان اول الكلام...تهنئه على ان مصر مش هتقترض من صندوق النقد الدولى..
.
وقالها مسبوقة بجمله" .. تحت تأثير الضغط الشعبى"
:)
يعنى الضغط والكلام بينفع... وممكن يجيب نتيجة.
.
زى كمان...ان دخل مصر فى شهر فبراير... اللى كان عز الانفلات.250 الف سائح..
...
المهم ان استاذ وائل...ذكر الكثير من الارقام والحقائق.... ان مصر مش هتفلس....ولا ان العجله مش عارفه تمشى...علشان الناس الفئويين..اللى بيتظاهروا
وذكر كمان.. ان الثورة اصابت السطح من الفاسديين.....و ما زال هناك الكثير ...علشان كدة لازم نستمر .
....
و من اكتر حاجة عرفتها اصابتنى بال ذهول..
ان بالرغم من احمد عز ما زال فى السجن...الا انه محتكر السوق؟
.....
!! انا عرفت حقيقه......
. النظام السابق ... كان من سحرة الفودو القدامى
J


ا وائل جمال لازم نشكر الرابطة.... والصحوة....وقوافل لتنظيمهم الرائع
:)
وده الايفنت
http://www.facebook.com/event.php?eid=230110720348993&ref=mf

Jun 21, 2011

تويت ندوة

وصلنا بدرى...
وعلى غير عاده المجتمع المصرى......تلاقى المتحدثيين موجوديين......وكمان شويه ناس .....وده دلالته عظيمه جدا
ان فى ناس متشوقه للحدث...لدرجة انها تنزل بدرى علشان توصل وتقعد فى مكان كويس
........
هو ايه اساسا ده؟
ااقولكوا ... هو تويت ندوة...... نقل النقاش والتفاعل من على النت والعالم الافتراضى اللى الواقع
والواقع...ان دى تانى تجربه.....تويت ندوة 2 يعنى
:)
وبدأت احداث الندوة قبل موعدها .....بأن اى حد عنده أى تحريض ...يقوله
....عايز الناس تروح مظاهرة.؟...وقفه احتجاجيه..... الحاجات دى يعنى
:)
ومع دقات الساعه 6 ونص وده الميعاد اللى المفروض الندوة فيه.....بدأت الندوة
ودى حاجة محصلتش ليا فى القاهرة غير مرتيين ولا حاجة.
بدأت الندوة وكأنك ركبت آله الزمن ورجعت قبل الثورة
......
ذكريات بتتقال من 2001.....و2003 و2005
وكأنها حدثت يوم 25 و28 يناير 2011
......
الجميل فى الحدث....ان الابتسامه كانت غالبه...... والحوار الودى بين الجميع...... وتفاعل الناس مع اللى بيتقال
:)

وده مختلف عن اللى بشوفه كل يوم على التليفزيون.......
هو احنا ليه بنعمل كدة فى نفسنا؟......... ما احنا زى الفل اهو....
انا عايزة تويت ندوة كل يوميين........ومش هاتفرج على التليفزيون
:)
فكرونا بان الثورة محصلتش بين يوميين وليله..... وان حصل بورفات للثورة اكتر من 3 مرات ولا حاجة
ايام الانتفاضه الفلسطينية ...اللى الناس كانت بتبدأ الهتاف لفلسطيين ....وينتهى بالهتاف ضد الحكومة
ومظاهرات طلبه الجامعات ....ومظاهرات واعتصامات العُمال......
اللى ملهمش اكونت على الفيس بوك :).
واحتجاج القضاه فى .... 2005 ....
كل ده كان بيقول ان مصر كالبركان هينفجر فى اى لحظة.....فلو عايزيين نعرف الثورة اتعملت ازاى وبدأت امتى
فارجع ورا 10 سنيين..
.وكان دايما سؤال ....الناس اللى نزلوا يوم 25 و28 يناير...جم منيين.؟.
واقتبس اجابه من الندوة
( كُنا بنتفرج على الجزيرة ...على المجانيين اللى بيحرقوا صور حُسنى مبارك)
الشعب .. كان متابع وعارف ... لكنه كان منتظر لحظة الخلاص
..
فنفس الشعب اللى نزل وكسر وداس على صورة حسنى مبارك فى اضراب 6 ابريل 2008
هو نفس الشعب اللى نزل هتف باسقاط النظام... 25 يناير 2011
.......
ومن الاخر........ انا شفت بعينى-ومحدش قالى - ان بتوع تويتر......
بتوع الفضاء الالكترونى.....مش بيهاتوا مع نفسهم...... ولا بيحاربوا من خلف شاشه
..... وانهم ممكن ينزلوا الشارع ويكونوا مؤثريين
يكفى انى اسمع كذا واحد يمسك الميكروفون.....ويقول ....فلان ...مش من تويتر
:)

ولو بصه كدة على الصور..... ممكن يوصل ليك الجو العام






http://www.facebook.com/event.php?eid=160865427312652
ده كان ايفنت الندوة.....للمعلومات ليس الا
:والمتحدثيين
كانوا

عايدة سيف الدوله
وائل خليل
حسام الحملاوى
خلود صابر


وده لينك لشويه صور ....
http://www.flickr.com/photos/hebaelkholy/sets/72157627017315994/

Jun 13, 2011

ضرسى المخلوع


تخيل
..............
بنت صغنطوطة عندها 9 سنيين وقاعده على كرسى دكتور السنان.......ومفيش حته سليمة فى سننانها
............... وكل سنتى متر فى اللثه بتنزل دم
.........
والكلام ده كان مرتيين فى الاسبوع..........
اهو انا كنت اخت البنت الصغنطوطة دى
ومش عارفه ايه الحكمة....بس ماما كانت بتخلينى ااروح مع اختى كل مرة
.............
وفى مرة عمرى ما هانساها.......... لقيت الدكتور بيبصلى .....وزى افلام الرعب كدة .....الدنيا ضلمت من حواليا
وقالى " وانتى الدور هيجي عليكى امتى بقى"......... تقريبا اتحفرت فى ذاكرتى اللحظة دى
ومن ساعتها وانا زى ما تقولوا كدة......بقيت متخيله دكاترة السنان وحوش بشرية
:)

حد يسألنى بقى طيب واختى اللى اتعمل فيها كل ده ايه حالها
؟
هيا عادى جدا .....زى ما تقول عملت كبت للذكريات دى
........
ودلوقتى نفسها تطلع دكتورة سنان
................ المهم بقى .
انى بعد الفترة دى حلفت على نفسى انى اغسل سنانى كل يوم
علشان ميجيش عليا اليوم اللى اروح للوحش
.............
بس جت مرحلة الثانوية العامية
وما ادراك ما الثانوية...
زى ما تقول كدة دخلت غيبوبة
:)
...............
ولما خرجت ....كانت اللثة بتاعتى حمرا جدا جدا
ولما اجى اعسل سنانى بتنزل دم............. اوم ايه؟
انا خفت قولت كدة هيخلونى اروح للدكتور
فانا مش هاقول لحد .....وخلينى كدة
الدنيا ماشة
........
وعليها يا مؤمن لحد ما بقيت فى الكليه
واى حد كان يشوف سنانى يقولى يا نهار ابيض انتى ساكته ازاى كدة؟.........انا ااقول اهون من انى اروح لدكتور السنان
........... وبعدها بعد كثير من الممانعه والزق والضرب والعياط
والخوف طبعا
رحت لدكتور علشان يشوف اللثه بتاعتى.................
وطلعت حاجة بسيطة جدا فعلا......مجرد تنضيف
:)
بس ده ميمنعش ان وشى كان بيحمُر دم.......وبطنى تكرركب
.......................
واول ما اخرج اروح اصلى ركعتيين شكر
:)
والحمد لله واصت على انى اغسل سنانى من وقتها......وكنت ملتزمة جدا
...............
لكن كان فى دايما كابوس عارفه انه جاى جاى
:)
كان عندى ضرس زيادة..................ايوة زياده
تقولش سمكة قرش عندها صفوف من الاسنان
:)
كان ضرس طالع جنب واحد تانى......ولما كنت عند الدكتور قالى طالما مش بيوجعك .....خلاص
:)
وده كان من 5 سنيين
ومن يوميين بقى .....بقى يوجعنى جدا
وبيرسل نبضات ألم .....لفكى كله
ورحت للدكتور...................
اكلمكم الان......مع احساسى ان شفايفى طالعه قدام 2 متر
:)
وفمى نظيف من سن القرش:)
.....................
ازاى دخلت وطلعت .............من غير اى قلق ....مش عارفه
اصلى قولت اقرأ قرأن كدة......واقعدت اكلم الطفله جوايا.....
ان مفيش حاجة هتحصل وان كل حاجة هتكون كويسة.......وانى هاجيب لنفسى حاجة حلوة ...
لو كنت بنت امورة وعسوله ومعملتش قلق للدكتور...
ولو انى استحملت الألم ......هاشترى لنفسى آيس كريم
:)

...........................
وطبعا مفيش فايده.......
انا صحيح مطلعش صوتى خالص
:)
لكن شوفت الكماشة اللى مسكها ........ علشان يخلع الضرس
ياماااااما
...............
والدكتور بقى ....بيسألنى وانتى خريجة ايه؟
ايه ده فنون جميله؟....فنانه يعنى؟
..........
كان نفسى ااقوله .............. شوف شغلك يااسطى لو سمحت:)

زى بالظبط اول ما رحت.....والست اللى المفورض بتاخد الفلوس....
بتسألنى سؤال مهم جدا
................
عايزة دكتور ......ولا دكتورة ست
:s.................... انا قولتلها
لو عندكوا عفريت جوه يخلصنى من الألم ده
دخلينى
:)
وفى الاخر احب ااقول
ان الدكتور خلع ضرسى زى ما الشعب المصرى خلع المخلوع
المخلووووووووووووووووووووع
:)

Jun 4, 2011

نانسى



اشتغلت فى مبنى الاذاعة والتليفزيون (ماسبيرو)لمدة 14 سنة من سنة 1994 حتى 2007
اشتغلت فى معظم استديوهات التليفزيون فى القنوات النيل المتخصصة الاخبار والرياضة والفضائية المصرية والنيل الانجليزية والبرامج الرياضية والدينية والتعليمية والثقافية فى القناة الاولى والثانية والثالثة.....الخ
تقريبا فى عام 2005 عندما كنت اعمل فى احدى الاستديوهات كمساعد صوت كنت اجلس فى البلاتوة
وكان فى برنامج مسابقات معروف فى ذلك الوقت على القناة الاولى يوميا يسمى (اكسب مع الاولى)
وهو عبارة عن كل يوم سؤال والفائز يكسب 1000 جنية
كنت فى البلاتوة بعد انتهاء البرنامج وامامى على الترابيزة زجاجة بداخلها اوراق اسماء المتسابقين ّ
اخرجت ورقة من الزجاجة فتحت الورقة ورسمت خلف الورقة وبعد الانتهاء قمت باخذ ورقة اخرى لارسم عليها
لاكتشف ان الورقة فيها نفس الاسم الورقة الاولى قمت باخراج الورق كلة لاجد ان كل الورق مكتوب عليه نفس الاسم
اخذت الورق كلة لاحتفظ به للذكرى .
2011 هانى راشد

Jun 1, 2011

احنا اللى بندفع الدم


انهاردة المفروض انه يوم الكتابه عن المحاكمات العسكرية للمدنيين
...........
انا المفروض انى بعرف اكتب واعبر عن اللى جوايا ..........بس اللى بيحصل ده اكبر بكتير جدا من مقدرتى على التعبير
لان مفيش كلمات تكفى الاحساس اللى بيغلى جوايا
احنا المفروض اننا نتكلم ونضغط علشان حق كل واحد مدنى ميتحاكمش عسكرى
وكمان ميتقبضش عليه بلا سبب واقعى
وكمان ميضحكش على المحاميين بتوعه ويصدر الحكم بعد ما يخدعوهم
لكن اللى وجع قلبى ان حتى الشهداء ما زالوا يتعاملوا نفس المعامله اللى ماتوا علشان متحصلش فى مصر تانى
ايه اللى اتغير يعنى؟
محطة المترو بقى اسمها الشهداء؟.........كام مدرسة على كام مكتبة بقى اسمها الشهداء؟
اللى بيشوف المنطقة اللى فى العجوزة ....وهناك كان فى رسومات للشهداء
كان احمد بسيونى ومصطفى الصاوى وكام حد كدة
لو رحت المكان ده قريب اكيد اخدت بالك ان الرسومات تم تشويهها ........... شخص ايا كان هو ....جاب سبراى بلون احمر ورشه على وشوش الشداء
السؤال .....هو ليه؟................. ازاى اى انسان ايا كان معتقده ان كان مبارك نبى على الارض او انه شيطان
ازاى يطاوعك قلبك وتمسح وش واحد مات علشان يجيبلك حقك
.......................
وازاى انا شفت ده امبارح ااقدر اتكلم عن اى حاجة فى الدنيا انا عيزاها ............
دول ناس ضحوا بحياتهم علشانا
اذا كان اللى ماتوا علشان البلد لسه حقهم مجاش
ولسه فى ناس بشتم فيهم وبتشوهه وجوههم


عارفه انى اتكلمت عن حاجة مختلفه ..........بس كله متصل ببعضه.........
يامجلس ياعسكرى ...........احنا اللى بنعيش علشان نشوف بلدنا زى ما شوفناها فى احلامنا
احنا اللى بنموت مبتسميين علشان نشم ريحة الحرية
احنا اللى بندفع الدم .............
تعتقدوا انكوا لو حاكمتوا الشباب عسكريا ده هيوقفنا او يغير تفكيرنا ؟
انا اسفه
لكن احنا هنكون دايما شوكة فى ظهوركوا
ولو مش مصدقيين ..........ابقوا انزلوا وسط البلد كدة وشوفوا صورة عمر البحيرى
موجودة فى كل مكان وهتكون كابوس لكل ظالم

الثورة دى كانت للحرية ...........والحرية طائر هيقدر يطير مهما قصقصت جناحاته
قول عليا متفائله او غبيه او مغيبه
لكن انا عندى أمل وثقه فى ربنا






الصورة قبل التشويه :(