Apr 28, 2011

الفرح

الفرح
.............
هو ايه؟....... السعاده ذات نفسها.......هيا ايه؟
طيب سيبكوا من ده
الفرح اللى هو الفرح .....الزواج يعنى ؟
ليه لسه عندنا اصرار على ان الفرح ده بالاغانى اللى تجيب صداع وتجيب ترجيع لامؤاخذة
............. انا مش بحب الافراح .....دى حاجة اكتشفتها.....كنت عارفه يمكن كان عقلى الاواعى عارف
................
يعنى مثلا بتضايقنى جدا طريقه تصرف البنات........
وانا مش هاحكم على حد .....
وبيضايقنى جدا الفكرة ذات نفسها
مش عارفه ليه بكتب ده
يمكن لانى لسه جايه من كتب كتاب
..............
ودى حاجة كانت فى دماغى ....يعنى ايه حد يدفع ب ال20 الف تأجير قاعه
ليه يعنى مش فاهمه؟
......................
المهم..................
ليه البنات بتحب الفرح ؟؟؟؟؟
سؤال يطرح نفسه
:)

Apr 24, 2011

random


ياربى ازاى الصورة دى كدة؟



السجااااااااير



Apr 19, 2011

السلام

لما تحس انك بتفقد بطاريتك اللى انت عايش بيها
لما تحس...... انك ابتديت تبقى مجوف من جوه
يبقى فى حاجة غلط
انا انسانه متفائله بطبعى
لكن احيانا فى حاجات بتبقى فوق الطاقه
ذى مثلا انك تختار طريقه تفكيرك.........او طريقه عيشك لحياتك
وتلاقى ناس بتحاول تفرض عليك حاجة
هو الواحد بيقعد سنيين من حياته يكون طريقه تفكير....علشان يجى اى شخص عايز يمسحها كدة بسوله؟
والتدخل فى طريقه التفكير وطريقه عيش الحياه ده صعب شويتتين
......................
السؤال ليه مش بنحترم الاختلاف
وليه مش بنسيب الناس فى حالها؟
..........
وليه بنفتى ؟.............انا لو مش عارفه شخص مش هنصحه......انصحه بأمارة ايه؟
.........
لكن تلاقى حد مشفش وشى بقاله شهور.......واول كلمه ....انتى ازاى تعملى كدة؟....وازاى متعمليش كدة؟
........
ايه؟
انا نفسى بجد العيله والحبايب والاصحاب
يفرقوا بين انى بحبهم وبعزهم.........وبين ان ملكوش دعوة بيا
انا ليا تفيكرى وليا طريقتى فى الحياه
مش هتبقوا شاطريين اوى لما تتفهوا من شخص
ومش هتبقوا ابطال لما تنصحنى بحاجات انتوا مش فاهميين فيها حاجة

ارحمونى ...........يرحمكم الله
..............
المهم ان حاليا
الدنيا مش ظريفه
مش عارفه ليه بكتب ده على المدونة
بس انا اتفقت مع نفسى من الاول....ان المدونة دى كأنها فضفضه مع نفسى
.............
ولانى صعب انى افش غلى فى شخص ........فانا بفش غلى فى الكتابه
زى ما انا بتقبل نفسى وانا متفائله
للاسف مضطرة اتقبل نفسى وانا متشائمه.....
او محبطه
.............
وانا محبطه دلوقتى
..................................
اللى بعمله كل مرة
انى اسيب الامور تمشى زى ما تمشى ........وربنا يعديها على خير

السلام

Apr 16, 2011






بدون اى كلمه
:)

المحظور



واتحل.....اتحل....اتحل.

الحزب الوطنى المحظور

وهنحكى لاولادنا........كان حزب بدأ على يد واحد اسمه السادات.............وانتهى على يد واحد اسمه السادات.................ايوه ياجدعان..دنيا


الحزب الوطنى المحلول......الحزب الوطنى المفلول.........الحزب الوطنى ..المحظور .......الحزب الوطنى....المهزوز......الحزب الوطنى باباى

الحزب الواطى..............باااااااااااطل .......الاديمقراطى...........باااااااااااااااطل ........

ياحلاوة ياولاد.............. مش مهم الحر..........مش مهم الفلول..............الحزب الوطنى المحلول

احب ااقول......كلمه...........بسم الله الرحمن الرحيم.............الاجابه.....الشعب المصرى.....

ذكريات

اتفرجت على فيلم وثائقى على قناه البى بى سى عربى عن الثورة
كان رائع..............
وفجر ذكريات كتير جوايا....من يوم الغضب
دى بعضها
....................
وبعديين صوروا فى رمسيس....يوم الغضب...انا كنت هناك........ فعلا احلى يوم عشته فى حياتى

كنت فى رمسيس..... واول مرة فى حياتى انزل مظاهرة ...وكنت لوحدى ...مفيش حد رضى ينزل معايا.....وكل اللى فى دماغى .....انى اصور اصور اصور


وبعدها لما بدأ الضرب.......مكنتش مصدقه ان ده حقيقى


وشفت شهامه عمرى ما كنت متخيله انها موجودة فى الشباب المصرى.....كنت دايما بقول .....البلد دى مفيهاش راجل .......معلش بقى .....اثبتوا خطأى

يعنى ايه ولد عمره ما عرفنى فى حياته....يحمينى ....؟.....ويدخلنى فى وقت الضرب فى مدخل عمارة مع البنات علشان ميحصلناش حاجة


يعنى ايه ....يجى واحد عمره ماشافنى فى حياته ........... ويقولى امسكى فى ايد اخواتك ...... ونمشى احنا بنات مع بعض........واربع ولاد يحمونا


ويعنى ايه ...... ميرضاش يمشى فى مكان الا لما يطمن ان مفيش امن مركزى............... وان مفيش ضرب......ومش هامه حاجة


وبعديين لما نمشى فى شوارع العتبه الجدعه........والناس بتنزل من بيوتها....... كان جسمى بيقشعر.....مكنتش مصدقة ......


اول مرة فى حياتى اعيط فى الشارع جهارا نهارا............... مصر قامت......مصر قامت ...........مكنتش مستوعبه اللى بيحصل


وبعديين ..........لما كنا بنعدى من زخانيق العتبه...كانوا بيتريقوا علينا...وبعدها بدقايق .....طلعت وحوش لارض...من كل زقاق ومن كل حارة فيكى ياعتبه

وبعديين ...عارفيين يعنى ايه عتبه؟......يعنى جحافل من البشر...بتهتف...ياجمال ياخسيس قول لابوك مفيش توريث.....كنت حاسه انهم ممكن يحرروا القدس


ولما قالوا يالا على التحرير.......ساعتها قامت الساعه.........ومفيش رحمه....كانت قنابل..ورصاص...وبلى ....وامن مركزى متوحش......بس على مين؟


بعديين شباب الرويعى بالذات ....الف تحيه...استضافوا اكتر من 10 بنات ....فى محل ترزى ...وقعدوا ويضربوا الامن المركزى اللى مكانش عارف يدخل فى الحوارى فبيضرب من بعيد .....الجبان

......

ومكانش قدام ناس محبوسة ..وسامعه ضرب وحرب بره الباب.....اى مصدر غير الجزيرة ....الله يكرمها.....كنا بناخد الاخبار بلهفه..ومش مصدقيين .دى مصر


ولما حاولنا ننزل .... الشباب عملوا حولينا كردون علشان ضرب الامن ميجيش فينا...............كنت فى حلم


نفسى اعرف كل واحد منهم..واروح اتأسفله على انى عمرى ما عرفت انهم ممكن يعملوا كدة..ومش كدة...كنت بشتم فيهم كمان.ياكل شاب فى اليوم ده.انا اسفه


وبعديين حاولنا نوصل للتحرير بأى طريقه..... مشينا فى حوارى ...ودخلنا فى متاهه .....كان المهم ......نبعد عن الامن المركزى..... نبعد عنهم

وصلنا لميدان طلعت حرب......وكان فيه ناس كتير اوى....مين دول...جم منين؟......



ساعتها....ومن شارع جانبى .... انضربت قنبله غاز.....جت تحت رجلى بالظبط........مكانش فيه عقل انك تتصرف....رجلى اتجمدت .... اعمل ايه؟.


ولما حاولت انى اجرى منها....كان الغاز عمل مفعوله..كانت ايد هيا اللى انقذتنى .... كان شخص مجهول بالنسبه ليا.....بس كانت ايد حياه بالنسبه ليا


مكانش فيه وسط.....انت مش هتروح ..انهاردة...انت ياتنتصر.......ياهتموت هنا.......وانا كان شكلى هموت فيها


لكن كان واضح ان الشرطة عايزة تحصرنا فى مكان واحد......اكتفت بكام قنبله غاز.......وبعدها بدأت الاعداد تزيد.......وتزيد.....والارض بترتج..لما بيهنفوا ويضربوا برجليهم


ولما الاعداد زادت...وبدأ الهتاف...الشرطة مكانتش بتدخل....الا لوحاولت تقول يالا على التحرير.


وبعديين ..........احنا كنا فى طلعت حرب....كنا فعلا فى حرب....وفى الحرب ممنوع عنك الاتصالات .....كان فاضل لنا الجزيرة


عمرى ما انسى المشهد ده...راجل واقف فى الشارع ...وبينادى على شخص ساكن فى دور عالى ...يقوله ايه اللى بيحصل؟......

يدخل ويطلع يقوله...السويس بينتصروا على الشرطة .....فكله تحت....الله اكبر.....ويدخل ويطلع ...الاسكندرية فيها الشرطة تنسحب....كله ...الله اكير

ولما زادت الاعداد بشكل كبير...وبدأ...الناس تقول...على التحرير..على التحرير.......بدأت الحرب مجددا


كانت غاز مسيل للدموع....مش طبيعى ...لانه بيخليك عايز تهرش فى وشك لحد ما تجيب دم ........وكمان الرصاص المطاطى......لكن الاسوء.....هو التدافع


لاننا واحنا بنجرى ...فجأه وجدتنى امام عربيه ......ومكنتش عارفه اتصرف....وكل الناس اللى بتجرى دى...مش بتهزر..دول بيجروا من موت.....مش هيقفوا


لكن وخلافا لأى حاجه كنت متخيلها......وجدت شباب بيقولوا ...البنات ياناس...عدوهم.......لكن جت متأخرة شويه....لانى كنت خلاص اخدت الضربات....


والضربات دى....كانت فى كتفى بضهرى .عرفت ان فيه حاجه غلط...بس احنا كنا فى حرب.لازم تتحرك ومفيش حاجة اسمها ألم .وبالذات لما يكون جنبك ناس ماتت


لكن ... فى اللحظة دى...انا تهت من اصدقاء الثورة .... وساعتها.... كان اسوأ احساس.......كانوا ذى ظهر بتكىء عليه.....دلوقتى اعمل ايه؟

لكنى وجدتهم...كانوا بيساعدوا الناس ...بالبصل وبالخل.......عرفت ساعتها اننا هننتصر


بعدها...شفت الويل...كان ضرب عنيف بلا مبرر...وكانت الشرطة ... بتقبض على الشباب....وتحطهم فى عربية الاسعاف.........يعنى ايه؟..الاسعاف ياكفرة


وهنا...كان كل اللى حواليا ...بيبصولونا....اوعوا تمشوا....هننتصر...احنا صح.....وهنا جائت الامدادات....ميه وسندوتشات من الناش


مكنتش مصدقة يعنى ايه صاحب محل...يفتح المحل...ويطلع كل الاكل للناس.......هوا شاف فيهم الأمل


وكنت فعلا جعانه.....لكن كانت الاحذاث اسرع من انك تاكل.... كانت امامنا الجزيرة ..وكان الخبر.....الجيش هينزل


نعم؟....مين.؟جيش مين اللى ينزل؟..... لكن فعلا شفت الشرطة بتركب عربياتها.......وتمشى .......كنت حاسه انى بحلم ......عليا النعمه كنت بحلم


لكن انسحاب الشرطة...مكانش سهل زى ما كنت متوقعه.. بدأ فجأه حريقه......فى بوكس شرطة....عرفت ان هنا وخلاص...لازم اروح.......بس مين ده اللى يروح


وشفت ساعتها....ملاك...لكن كان لونه اسود...تاكسى....وقفه محمد..... الراجل...اللى ربنا يبارك فيه...اللى عمره ما عرفنى لكنه دافع عنى كأنى اخته


لما وصلت كوبرى القبه ... كانت الامور هادئه...اللى حد ما.....ثم سمعت خطاب الرئيس المخلوع .....وعمرى فى حياتى ما شتمت الشتايم دى.....


حرق دمى الله يحرق دمه....وميموتش...يفضل عايش بحق ده يوم عشته .........وساعتها عرفت ان الثورة مش بس هتستمر........ لأ....دى هتشعلل فى وشه

وبعديين بدأ.....ضرب النار...خالتى ساكنه قريب من القسم...والشباب كانوا جنب القسم ....لكن ضربوا نار بغباء..سقط اكتر من


واللى ضحكنى جدا....ان عمتى اللى عايشة فى امريكا اتصلت بيا هناك....وقعدت تقولى ليه كدة يابنتى ...ربنا يهديكى...وحرام عليكى بقى وكدة

لكن اليوم ده مرضيش يخلص....فضلت صاحيه لحد الساعه 4 بليل.....لكن هنا كانت بدأت تأثير الضربه اللى اخدتها..تظهر

كان الألم مش طبيعى......وبعديين خطاب مبارك ده حرق دمى بطريقة مش طبيعيه......كنت حاسه ان هيجرالى حاجة

المهم اننا نفتكر اننا انهاردة واحنا بنحاكم مبارك
الشهداء اللى ضحوا بحياتهم علشان نقدر نعيش
ونشم الحرية
..............
الله يرحم كل شهيد ...
ويصبر اهل كل شهيد
يارب



Apr 4, 2011

محب فايز


نفسي أعترف وأحكي حاجات كتيير جوايا

نفسي أعترف من غير حرام وعيب وكفاية

نفسي أعيط من غير ما حد يضحك عليا

نفسي أعيط ومش عايز حد يعيط معايا

نفسي أجري في الشارع بسرعة

وأنكفي على وشي وأنجرح

الاقيكي مده أيديك وبتقولي معلش

نفسي أغني بعلو صوتي وأقول إن الألم واجع

بس صوتي ما يتسمعش

علشان محدش يقولي صوتك وحش

ويوقف غنايا

نفسي تضيع فردة شبشبي اليمين

علشان أعقد أدور عليها وأتلهي

وأنسى أني حزين

وأنسى الحكاية

نفسي عقلي يتلحس


معرفش أفرق بين الأيام والسنين

معرفش دي نص السنة ولا البداية

نفسي ما بقاش واحد

كفاية عليا نص

نفسي كل ما أفكر أشوف نفسي معرفش أبص

أو ملقاش المرايا

نفسي أحكي لكم من غير ما اعافر

وبكرة أبرد ف الاقيكوا ساتر

فأحضنكوا تضحكوا

أصلكوا ناس نسايا


نفسي أعترف بس مش قادر


محب فايز

مغامرة ... فى المطر

ليه الواحد لما يقعد فى بيته مدة طويلة وبعديين ينزل الشارع ....
يعيش اثارة تكفى لسنوات
زى مصر بالظبط.....نقعد 30 سنة من غير اى حاجة جديدة...وفجئتا.....نعيش فى شهور اثارة سنين

امبارح
يالهوى
....هو الوصف الصحيح....والادق
انا نزلت من بيتى القاطن فى 15 مايو -بعد حلوان-الساعة 9صباحا
لان كان فى اذاعة على الهوا فى اذاعة الشباب والرياضة ........
عن معرض قائمة عليه ومشتركة فيه
وبغض النظر عن الاستاذة المحاورة الرائعة اللى مش فاهمة اى حاجة فى الفن
وكمان بتذيع من الموبايل......
والحمد لله عدى الامر على خير
وبعديين كان المفروض انى اروح ماسبيرو ..
الساعة 5 علشان نطلع هوا الساعة 6 فى قناه النيل الثقافية
انا كنت فى قصر الامير طاز وهو مكان رائع بالمناسبة للى لم يزوره
خلصنا الاذاعة على الساعة 12
وفرق الاوقت طويل ..... لكنة لا يكفى انى اروح وارجع تانى
ومفيش بديل الا انى اضيع الوقت ده فى اى حاجة....وبما انى اعشق التمشية ...
قولت اخدها مشى
وربنا يسهل
ويامؤمن .... لسة بقول بسم الله....وخارجة من القصر
الا والاقى المطرة نازلة ترف على ام دماغى
خير ....خير
مش مشكلة خالص
......وقفت انا وصحبتى تحت بيت قديم قبل جامع ابن طولون كدة
والجميل ان اطفال لسة طالعيين من المدرسة .....وقفوا جنبنا.....واد ايه شكلهم حلو اوى وهما مبسوطيين بالمطرة...وبيدعوا انهم ينجحوا
.....وواحد قال يارب مصر تكون حلوة
......
وبعديين ...الحل الامثل ...تاكسى
وقفنا تاكسى وقولناله ....اى محطة مترو
وهناك لقطات جميلة ...زى الاطفال اللى مشيوا يتطرطشوا المياه على بعض...وهما فى قمة السعادة
وهناك البنات اللى وقفوا مع بعض تحت مظلة محل كبير عند سعد زغلول كدة
المهم انى وصلت محطة انور السادات على الساعة 2
وبقى انى قدامى 3 ساعات
ولاول مرة فى حياتى اقرأ جرنال كامل
انا فى العادى بشترى الشروق كل يوم....اقرأ لفهمى هويدى وعبد الفتاح .......وكم واحد كدة وخلاص
لكن امبارح قرأت الجرنال كلة......
والساعة بقت 3 الا ربع
وانا مش بطيق انى استنى فى محطة مترو كدة...بيجيلى حول من كتر الناس ....قولت بما انى مكلتش حاجة طول اليوم
لايضرنى بعض المطر انى اشترى حاجة....خرجت ناحية كنتاكى كدة....ورحت فلفلة
......
وطبعا من خلال مطر جميلة ....وانا من الشخصيات اللى بتلبس نضارة....
نفسى حد يخترع مساحات للنضارة
المهم ..... ومن رؤيتى الضبابية .....اشتريت الشندويتش.......
هدفى الان هو ماسبيرو........ ويامؤمن من طلعت حرب ...ولحد المتحف المصرى .......وانا اخدت المطر باحترام.......كما انى اخدت رفض تاكسيات بالهبل.....باحترام برضه
مش فاهمة كل ما اقول لتاكسى...ماسبيرو......يبصلى جامد قوى كدة........ويمشى
انا مش راحقة اعمل حاجة وحشة على فكرة
.....
حاولت العب على الا وعى عندى......
قعدت ااقول لنفسى بصوت عالى ....انتى بتمشى...العربيات كلها واقفة...
وبعديين ابتديت ااقول لنفسى....انا مستمتعة...انا مبسوطة....
الله يسامحه لاوعيى .....مصدقنيش
فى الاخر ومن تحت الكوبرى وقف تاكسى......أبيض لونا صحيح ...لكنه يحمل داخله شخص اسود التوجه
وصلت لماسبيرو....وكان العداد بيقول 3 ج
انا ادتله 5 ج.......ادانى باقى جنيه ونص..........
وكعاده الشخصية الرائعة اللى هو انا
قولتله هو مش 5 - 3 =2
قالى مش معايا فكه.......
نعم؟
هوا انا اتبدهل ده كله......وكمان يضحك عليا
لأ معلش بقى
..............دخلت فى اعماق الشنطة .....وجمعت البرايز والشلنات .....وادتله ال3 ج...
واخدت الخمسة ج بتاعتى حبيبتى.......استهبال اصله هو

.........
ومقولكوش بقى على الجمال والروعة اللى حسيت بيها وانا داخلة....ايه ده كله...جيش كتير واقف بره
وانا داخلة عماله احايل الا وعى....مش هما دول اللى ضربوا اصحابى فى التحرير...مش هما دول
اللى بهدلوا البنات فى المتحف
والله يخرب بيته لا وعيى ...مش بيسمع الكلام
دخلت بعد محايله فى الامن ان الكاميرا بتاعتى دى ...نفس ..مستغناش عنها
وانى معنديش غرض دنىء
دخلت المبنى الحصين والحمد لله
كانت الساعة 3ونص وشوية
قعدت بقى اتفرج على الشعارات اللى كاتبنها....والناس المعتصميين...
وحسيت باغراء اكتر من 50 مرة انى اصور عساكر الجيش.......بس حسيت انى ممكن اروح فى داهية ولا حاجة
وبما ان مصر ام الدنيا........ معده البرنامج...نسيت موبيلاتها فى البيت..... وزميلى اللى المفروض يجى ....لسه مجاش
والساعة بقت 5......
وبعديين اتصلت بيا من تليفون غريب..... اطلعى على الباب بره...
وبعديين خدتنى انا وزميلى...........ويابوى على الدهاليز.......
ده مش مبنى.....دى مغارة على بابا والسبعميت حرامى
على الطلاج لو كانت قالتلى روحى مكنت عرفت اتحرك من مكانى
.......
وبما اننا برضة لسة فى مصر ام الدنيا........
البرنامج اللى المفروض يخرج هوا الساعة 6 م.....
الساعة 6 كان الراجل بيكنس الاستوديو
...........
لقطات بقى..
البرنامج بيقدمه مذيع بلا اى مبالغة........ فاكر نفسه مثقف وهو .....فسسسسسسسسسسسسس
المذيعة بقى ....... الوجه الجميل..... ..
بلاش خلينا فى حالنا
واحد كان حامل فى الثورة المضاده....وبعديين خرجت على المصريين....وبقى هو
عمال يقولى ...عارفة لو سألتى اى حد انت عملت الثورة ليه .....مش هيعرف
واحنا مشينا حرامى وجه 50 حرامى....... ومفيش فايدة...ويخربيته
انا مصدعة اساسا وعايزة اروح بيتنا
انقذنى احمد الله يكرمه
...وشوف بقى ..لما يكون هيطلع معانا مدرب تنمية بشرية ...
ويقول للمعده ...انا عملت تدريب واحد والشركة عملت 20 تدريب....تقوله يعنى نقول انك انت اللى عملت...يقولها....ماشى

المهم طلعنا هوا .... وحاجة ربنا ستار حليم......
المهم خلصنا
وخرجنا من الدهاليز الساعة 8وتلت
وايه كمية البلطجة ...والهبل اللى على الكورنيش ده
طب انا واحدة بطرحة ...وجيبة بتجرر فى الارض.....واومال لو واحدة....كدة شوية
كان ايه اللى حصلها......
المهم
وصلت محطة الاوبرا.....وبمجرد انى طلعت فى السادات...........وعينك ماتشوف الا النور
......
ياسلام...ايه الحب ده ياجماعة ؟.....كلنا واقفيين مع بعض...
لآ وكمان ايه؟.....المترو شايف اننا مش كفاية...كان المترو يجى وبعد الزق والضرب والناس ركبت
يقولهم انزلوا المترو رايح المرج.......
ياسلااااااااااااااام......
لأ وكمان ......بعد يجى بنص ساعة ...يقول للناس.....اللى رايح المرج يروح رصيف حلوان....علشان المترو اللى جاى هيروح المرج
طيب واللى رايح حلوان؟.......طظ يعنى
المهم لان مشاعر الساعات دى..... ممتكتبش
ركبنا....وتحرك المترو الساعة 11الا ربع
....
وبما اننا ستات فى بعضينا
لايمنع بعض الفعص والزق .... والخنقة وكل حاجة....لكن ان الرجاله تركب بالعافية؟......وبعديين واحد ظريف ابن ظريف
يشتم فى الستات اللى قاعدة...ولما بنت تحاول تسكته......يكون عايز يضربها........فدى حاجة سافلة
وااقدر اقولكوا انى شفت كل حاجة.... لانى كنت واقفة
عارفيين .... على المقعد ده...انا كنت واقفة عليه انا وصحبتى.... علشان الهوا تحت كان خلص
...
المهم...وصلت حلوان الساعة 12 الا ربع
......
وعينك ما تشوف الا النور...
مفيش اى حاجة من اى نوع تتركب
.....
وطبعا كل الشكر والتقدير لشبكة فودافون الرائعة......
اللى لما قطعت عننا الشبكة فى التحرير......
وقطعتها عننا امبارح...... فى بداية رائعة....... لانى ... اروح احاربهم....واخد منهم فلوس
....
وبما ان الستات بتستقوى ببعضها
اتجمعت مع بنتيين رايحيين فى طريقى

......
حاولنا نوقف تاكسى....لكن مفيش فايدة...
وبعديين ... ومن الا وجود....لقينا تاكسى فاضى... ركبنا.... وايمان-صاحبتى الجديدة- حاولت تخوفه فقالتله....انت نمرتك كام؟
قالها ليه؟.......مش فاكره والله
بعديين من الاوجود برضه...لقينا واحد نط فى التاكسى وركب جنب السواق
وبطريقة الحشاشيين الرائعيين......انا عارف انكم رايحيين مجاورة 4 .....اصلى سمعتكوا....
اعههههاعا
وبعديين ... النظرات... والهمسات.....
والسواق....هنوصلكوا .... هنصولكوا....اهاهااااااالعوووو

ايمان التانية -صاحبتى الجديدة- قالتلو نزلنا هنا......
فى الاول مرضيش..... وبعديين لما بصلنا...
انا بصيت فى عين الراجل اللى جنب السواق.......
وبحمد ربنا مليون مرة انى نزلت منه
ومعرفش شاف ايه؟ خاف...وبعديين نزلنا......
نزلنا فيين بقى ؟.....
الله
عند مستشفى حلوان العام........... حتة مقطوعة بامتياز
....
مكانش فى حل غير اننا نتصل بحد معاه عربية يوصلنا...
والانتظار اللى امتدت لحد اكتر من ربع ساعة
كان كأنه خمسيين ساعة
يتخللها الكثير.
من ....سترك يارب......استرها يارب
اللهم انا جعلناك فى نحورهم فاردد عليهم شرورهم
ولا مانع من بعض الحشاشيين....انهم يعدوا من قدامنا بالظبط....وبستر ربنا مشيفوناش.......
وافتكر برضة فى هذه اللحظات فودافون اللى مخاتنيش اكلم اهلى.....
شكرا يعنى
...........
وصولى البيت ...الساعة واحدة بعد منتصف الليل
كان اول مرة فى حياتى
حسيت انى نفسى ابوس الارض....وابوس السرير بتاعى.......وابوس التليفون
واقعد فى البيت شهر من غير ما اخرج خالص
.....
..............
انا جسديا كويسة جدا
لكنى نفسيا مش مصدقة اللى حصل ......
ومصدومة
......
وربنا يستر
طول عمرى متفائلة
....
:)