Jan 22, 2012

21/1

هل التمشيه فى الجو السقعه ...علميا ليها فوايد ؟
: )
..بقيت بستمتع اوى بالتمشية فى الجو السقعه ده
.وبعدى على النيل مرتيين
....وامبارح كنت بسمع محمد محسن وهو بيقول
.كوتشى اللى داب من اللف فى شوراعك
.قلبى القماش اللى اتكوى
...
امبارح لما اديت للدنيا فرصه
.ووصلت التحرير ...لقيت الصوت المميز ان فى مسيرة .
ممشتش فيها زى كل مرة ...سبقتها بكام خطوة
..وكنت على الناحيه التانيه ....وكنت مركزة مع الناس اللى بتتفرج
..اللى كان فرحان ومبسوط ..وحاسس انها حاجة مميزة
.واللى كانت بتشد بناتها وتجرى فى اى اتجاه عكس اتجاه المسيرة
..واللى كان واقف يتفرج وبنته الصغيره عنيها بتلمع بشكل رائع
: ).
.. والشباب لما وصلوا لطلعت حرب
.ونظموا المرور علشان العربيات ميجهاش هلع زى كل مرة
....انا مشيت
:) ..ركبت المترو باسمع الاغانى عادى
.لكن على ما يبدو كان فى واحدة مستفزة ...حسيت من تغير الجو وتغير الاجساد حواليا
..ولما وقفت الاغانى
سمعتها بتقول خيم ...بنات ...6 ابريل.
.فهمت
: )..كان فى بنتيين واقفيين قصادى ...بنت اتحمقت اوى وراحت تكلمها
..لما الكلام استفزنى اوى
..رحت متكلمه كلمتيين مفيش غيرهم
وبصوت عالى

....
افهم ازاى لما بنت زيك تتعرى تقفى فى صف الراجل
اللى طول عمره ظالمك ....من وانتى طفله لحد ما تتجوزيه
.بتقفى فى صف الجلاد ...مش الضحيه اللى زيك ؟
..
طبعا فى المترو مكانتش اللغه كده
:).
.. و عموما مش بحب اكون فى الاضواء ..او ان الناس ساكته وانا بتكلم
.بس ده كان الوضع
لقيت كله سكت .
...قلت فرصه
..الثورة بالنسبه ليا مش تظاهر بس ..الثورة ثورة فى كل حاجة
.... رحت متكلمه بقى
..و قولت برضه كلمتيين ....ردا على انها بيااعه شاى
..احنا بنتكلم ععن الانسانيه ..
يعنى بياعه الشاى مش انسانه؟؟تتسحل عادى ؟.
...يعنى لما ااقولك البنت دى طالبه فى هندسه ..كده هتدافعى عنها ؟؟
اخص
...
..
لأول مرة من زمان احس انى حيه
...
وكان جنبى واحدة سودانيه ...بتقولى هو انتوا مع مبارك ؟؟
ضحكتنى جدا بنت اللزينه
..قولتلها لأ طبعا .... بتقولى يعنى انا تاجرة .وبسمع فى الاعلام عن البلطجيه ..و عدم الامان
لما بكون فى مصر مش بشوف ده
: )
..واستمر الكلام
.حيث ان الستات بيحبوه اوى
..بس دى فرصه اكيد ان ممكن كلمه قولتلها تأثر فى تفكير ...وبالتالى اسره
.وتتسع الدايره
....


المهم ان بنت من اللى كانوا واقفيين جنبى ...و قعدنا نتناقش
..طلعت خريجة تربية فنيه ..مشتركة فى حاجات كتيرة بعملها
: )..خدنا نمر بعض ...وبقينا اصحاب
..
يا سلاام على الدنيا

ولما نزلت حلوان ...وكنت اشتريت حاجات كتيرة
.مفيش ميكروباسات بشكل سىء جدا
......
ولما هل هلاله والناس تتدافعت
.و عارف بقى تصرفات المصريين
بنت تطلع وتحجز للعائله كلها
الكنبه اللى ورا بتاخد 4 اشخاص ....هما بقى يركبوا 3 ...ويحطوا الشنط جنبهم ..
وبنت تقولهم ممكن اركب وهاشيلها ؟
يقولولها خلاص
..كلمتها وقولتلها معلش
..لكن تخيلوا الصدمه لما ركب السواق وقالهم العربية مش هتطلع .... انتوا مش قادريين تستحملوا بعض ؟؟
فى ثقافه الزحام مينفعش اللى بينفع فى العادى
ومش حكايه انكوا هتتدفعوا الاجره ..طالما فى واحد هيروح ...خلوه يروح والدنيا متأخر
والجو سقعه
...
: ). ينصر دينك يا استاذ نفيسسسه
..
..
انا روحت مبتسمه .
: )

Jan 19, 2012


وإيه نعطش نهون

او على الطريق نتعثر

محناش فراش هيموت

ولا إزاز يتكسر







الغنوة من قلبنا

من قلب قلب الروح

نصبر على جرحنا

كل الجروح هتروح



اكتئاب ..واحلام

...
كان عندى فلسفله خاصه بالحزن
. انى اتَقَبلُه...وهيعدى
وانى المفروض اتقبل اى حاجة فيا ومنى
.ولو اكتئاب
كنت ممكن اوصل لمرحله الاستمتاع بحاجة مختلفه
.بس الكلام ده ملا كان الاكتئاب يوميين ...3
.لكن يعدى عليا 3 اسابيع اكتئاب
كدة كتير ...او كدة انا محتاجة مساعده
محتاجة زقه
.الاكيد انى محتاجة مساعده .
وانا مش عارفه هيا ايه؟

.....

فى المرحله دى ...انا مش بس مش متسقه
انا مش مُرتبه
فى حالتى العاديه...تلاقى عقلى مُرتب
وباخد بالى من التفاصيل
.دلوقتى حتى المدومة تشهد عليا
.مفيش بوست بيتكلم فى حاجة واحدة
....
.. لما درست وعرفت حياه الفنانيين
عرفت ان اعظم لوحاتهم عملوها وهما مكتئبيين ..او وهما عندهم مصيبه
.اموت واعرف عملوها ازاى ولاد اللزينه
.لما اكون هموت منفجريين ..وارسم
ومش قادرة امسك فرشه اصلا
...

.

بقالى اكتر من شهر مصورتش صورة
O.o
....

ركبت المترو
لقيت ايد مسكتنى
. وبتتكلم عربى
بس مش فاهمه ولا كلمه
.. هيا بنت جميله جدا
كم اعشق البورتريهات
.كانت معاها طفل .
واضح انها سودانيه.او جنوب افريقيه
.حاولت انى افهمها انى مش بستهزأ بيها
انا فعلا مش سامعه هيا بتقول ايه؟
ولما حسيت انها زهقت منى سألت بنت تانيه
اسمعيها كدة
.ولما فهمت
.شاورتلها على المحطة..اعلى الباب
..سألتها انتى جايه منين؟
جايه من المُجمع..لحلوان
وعايزة تروح المطريه
.لما فكرت ...ليه مسألتش حد؟
وكانت وفرت على نفسها اكتر من ساعه ونص
ولا هيا سألت وتوههوها ؟
ايه احساس انك تكون غريب ومش عارف الناس هتتعامل معاك ازاى؟
او انك متخيل ان اى حد ممكن يتوههك
.المهم
انى قبل ما انزل شفت حد نازل بعديها
وعرفت طنط هيا عايزة تنزل فين ؟
وقولتلها خليكى معاها
....
انهاردة حسيت انى عملت حاجة فى حياتى
انهاردة ابتسمت ابتسامه صافيه لنفسى
. يمكن بدايه انفراجة.يا مسهل
:)
....
....
...
كنت دايما نفسى اشوف تغير
صغير اوى
كنت هاحس بيه ان الدنيا ابتدت تتعدل
. ساعه المترو
اللى فى نفس المحطة ..واحدة تُشير اللى 9 و خمس دقائق
.التانيه ...9 وعشر دقائق
...ارحمونى
!
..

كنت بسمع اغنيه
انت كل حاجة بتحلم بيها ..انت أملك الوحيد
.. كنت بقول يا شيخ اتلهى على عينك
.بس فكرت ..
ازاى الولد ده صوته وحش كدة
؟؟
وازاى اختى بتحب الفرقه دى كدة؟
...
وبعديين هو انت قولت حاجة ججديدة؟
من زمان وصلت للفكرة ان محدش هينفعنى غير نفسى
وعلشان كدة انا وحيده يا فالح
.



..
. احلامى الفترة دى غريبة عليا
.الوانها قاتمه جدا
. ودايما الدنيا مغيمه و عايزة تمطر
مرة اعصار ..ومرة هوا شديد
ازاى احلم احلامى من غير الوان
؟
وبعديين بفضل عايشة بيهم
..العادى ان احلامى الوانها مش طبيعيه ...عارفيين فيلم افاتار ؟
..زيه كدة ويمكن اكتر
داميا كنت بحلم انى بطير ...او راكبه سوسته وبنط
:)
...
وكنت اول ما اصحى ..ابتسم ..وانسى الحلم
ااقول انا حلمت حلم حلو انهاردة
بلا ادنى تفصيله صغيره
دلوقتى..انا فاكرة الحلم بقالى اسابيع
.اه يا دماغى
..
مرة احلم انى مسافرة نيويوك "عمرى ما رحتها".وراكبه طياره لعبه
تقولى ازاى؟ معرفش ؟
انا وعيتلى الصغيره راكبيين الطيارة اللعبه
..مرة تانيه ..راكبه بيجو ورايحة شرم الشيخ
عمرى ما رحتها برضه
.
امبارح حلمت اننا رايحيين بحر
.كنت مبسوطة جدا ...اعتقد ان الانببساط فى الحلم ضيق
ما علينا
.وبعديين فى ثوانى كنت جاهزة... لكن بابا خلى اخواتى ينزلوا الاول
وانا قعدت مع بنت خالتى وعماله اتحايل عليها
انا عايزة انزل بقى
:(.. الدنيا كانت ابيض واسود
.وانا كنت لابسه عُقد ملون...فى الحقيقه ..ماما
بتتخانق معايا علشان البس سلسله دهب
.كنت لابسه عقد وعقد
واحد طويل فيه اشكال حلوة
وواحد فضه
قلعت واحد منهم علشان البس الطرحة
.و لما لبستها كان نص شعرى باين
..وعماله احط خطط
هانزل البحر طول اليوم
.وهاعمل كذا وكذا وكذا
وبينت خالتى حبسانى مش عايزة تنزلنى
وبعديين لقيت اصحابى من ايام الكليه ومش عايزيين يكلمونى
.. وبعديين قعدت اعيط
:'(
وبعديين اتنقل موقع الاحداث للكليه
. وانا مسؤله عن حاجة مهمه
وبعديين ولد حط نمره تليفونى على الورق اللى بيوزعه للناس
علشان لو عايزيين يكلمونى"
..وانا اتجننت..و حاولت اجمع الورق
وكنت غضبانه جدا وعايزة اضربه
...
وبعديين اتنقلنا لفندق فخم جدا
مش بستريح فى الاماكن دى
.لكن قابلت واحدة صحبتى من ايام ثانوى
وهيا فى الحقيقه مش بتكلمنى اصلا
مخصمانى
..وحضنتنى جامد جدا
.الله ؟
ّ!
مش باخد الاحلام انها اشارات
.لكن هيا بتعبر عن واقعى جدا
.....
انا عايزة احلامى متلونة تانى
عايزة احلم انى بطير تانى
وبضحك تانى

مبقتش عايزة انام
وبقيت خايفه انام
..

Jan 18, 2012

مش متناسقه

تعرف ان انا كويسة
لما اكون لابسه حلقى الحمامه... ولما تكون ضوافرى مش متقرقضه
ولما احب احط روج
. بقالى فوق الشهر .. مش بحط روج
ضوافرى اختفت ... وحلقى مرمى فى العلبه مش بيطلع


..... هيك ..ليه عم تعمل هيك ؟


.. امبارح ..اتمشيت ..
شفت يافطه كبييييرة اوى .للمصريين الاحرار
كاتبيين مصر لا دينيه ولا عسكريه ..مدنية
اليافطة كانت بالابيض والاسود
وفوقها على طول فى يافطة مبهرجة..الوان ايه ؟ احمر وفوشيا وتحفه
.. لأمينه ..تُحيى حفله مش عارفه فين ؟
. المهم...انا وكأنى مضحكتش من زمان
#حقيقه
ضحكت
. حسيت مصر هشك بشك
مصر شيزوفرنيا
..وكان واحد شيك اوى
ببدله ..وواقف ساند على عربية
لقيته بص بغضب لليافطة وقالى ايه اللى بيضحك؟
قولت شكله واحد ثورى واتضايق
قولت انوره
وحتى موقفتش ثوانى .
انا شيلت السماعه من ودنى
وشاروت وقولت كلمتيين
..
بص لليافطة ..وبصلى
وقالى وانتى بقى رايحة فين؟ تعالى اوصلك
O.o
مشيت بقيت السكه... غضبانه من نفسى انىى مهزأتش امه
والنص التانى بفكر ارجع اديله على دماغ امه
.
.......


مدى ايدك ..آدى ايدى .
ده الطريق زحام
خلى قلبك ويا قلبى هتهون الالام

..

لما وصلت حلوان
لقيت الموقف كالعاده زحمة جدا
بس ان يجى ميكروباس . وواحدة حامل معاها ولد
ومتركبش
وتتزق
فجأه حسيت ان قلبى مقبوض
حسيت انى عايزة اشتم الناس كلها
. عايزة اكسر الميكروباس على اللى بيركبوه
.



...
انا خلاص
مش مبسوطة هنا
انا عايزة كوكب تانى
او حياه تانيه
.. انا موافقه ان الجيم اوفر
وانى خسرت
ومش متضايقه ولا ندمانه
بس عايزة جيم من جديد


....
كان فى حاجة هيا اللى مخليانى متماسكه
هيا اللى بتصحينى كل يوم من النوم
.هيا اللى بتخيلنى ابتسم فى عز ما انا متنيله
. مش عارفاها ايه هيا
؟ ومش عارفه راحت فين؟
ومش عارفه الاقها تانى ازاى؟

.
انا مش متناسقه مع نفسى
.
بس
.

Jan 16, 2012

..

لون احمر ... صفارة صوتها سخيف ... ملهمش غير معنى واحد .
..المترو وصل المحطة
. استسلمت ..وقولت هاركب اللى بعده

....
يا طير اسير محبوس ... نفسك تطير بره
....

فى لحظة معينه كدهو... همتى راحت ...رجلى مشيت بالراحه
... لأ هاركبه ...
خطوتيين بسرعه .
عنيا مُصره .....
لحقته.

...

ادى بضحك وحزين .

......


راجل كبير ..بيحاول يحط رجله على السلم المتحرك .....
برفع رجلى معاه ...
. هو نزل
....
انا نسيت
.
وقفت مكانى كتير
..
لحد ما فكرونى

..
طب مين انا وليه وفين وازاى يكون؟ الكلام عنى لكن مهوش منى
...

كنيسة..بقالى سنة بعدى عليها
كل يوم..
لحد ما قلبى خد شكل الازاز المكسور
. وكل يوم .
كل يوم.
. قلبى يوجعنى ..ووااقول ليه ؟
امبارح ..شفت ..
ازاز جديد
.
.دورى يا دنيا عليه ...وريه بعنيه
.


المترو . من محطة السيده زينب .لسعد زغلول... نسى عمو انه ينور النور
.تشوف الدنيا وكأنها فيلم أبيض واسود
وتشوف وشوش الناس على ضوء تليفوناتهم بس
و تبص على الانوار اللى متعلقه على الحيطة الاسمنتيه بره المترو
.وتفتكر .هوايتك وانت صغير انك تقعد تتفرج عليها .....تعدها .
.ودايما مامتك تقولك ..دوختنى وصدعتنى ...
قعدى ساكتة
.

فين الحقيقه يا خال ...تعبت علشانها القلوب
..


اتمشى اتمشى ....اتمشى
. وتدوى فى عقلى
محدش هينفعك غير نفسك
. اوعى تسلمى عقلك لحد
.. لا تُعولى على الناس
... الضربه هتيجى من ضهرك ...
اياكِ
.ثم اياكِ
هتفضلى لوحدك .
نسيتى نفسك ..كام يوم
. نسيتى كل ده
. راحت
....

. الحاله وسخة ......وسخة كتير





...ولد ... اتشطر عليه 3 ظباط شرطة
علشان ركب عربية السيدات
.مع انه بلييل ....بيخافوا .
سبع الليل ...بيطلع للولاد
فى النهار
لما يكون عارف .انه مش هياخد قلميين ..قصاد
كل قفا

....

هتفضل على طول لعبتها ....ا

...



كانت .. فاضل زقه
.. وتقوله بحبك
.. بس
. شافت حاجة.
شاف حاجة
وعدت الست تقول
. حد عايز مناديل يا ولادى؟
بعالج طفل يتيم

...

عمرى ما اتخيلت موقف عقلى مش راضى عليه

...




سوق..
طابور طويل ..مش قادريين نوصل
بس .علشان .
فى اتنين كانوا بيحكوا باندماج
فى اول الدنيا
...
معرفتش اصب عليهم لعناتى ؟
ولا ا طبطب عليهم
واعدى؟

...

نفسى ابقى حد غيرى نفسى يتغير مصيرى ...نفسى ابقى حر اكتر ..او اطير زى الحمام

...



ايدى ساقعه على طول
مع ان انا دفيانه
. على وشى ابتسامه دايما
مع انى انا حزينة
.. بمشى وانا نفسى اختفى
. عايشة وانا نفسى اغيب
... باكُل آيس كريم .
وانا عايزة استمتع بالآيس كريم
كله بيقولى اكبرى .
واعقلى
.وانا مش





نكبر وتكبر بينا اعمار السنيين ...
..ونكره السنيين وتكرهنا السنيين ..ونجرح البشر ونجرح نفسنا





Jan 15, 2012

موت؟!








الموت..... ممكن يطلق الفراشات جواك




كل اللى بفكر فيه دلوقتى انى اعملها جرافيتى فى مصر كلها
:D :D

خطوط دفاع ..وميكروباس

عندى خطوط دفاع .ضد الاكتئاب
. افضل اجيب واحدة ورا التانيه ...حتى ما انجح بصد
الغزو القاتل
وغالبا ما انجح
. وعندى خطوط اخرى ..لا الجأ لها الا للشديد القوى
. نبدأ ...مثلا الآيس كريم
اقوى خطوط دفاعى ....انى اكل آيس كريم . واستمتع بيه
افضى دماغى ... ده خط دفاع ودائما ما ينجح .
بس لما ده مينفعش .
البس الحلق بتاعى .... حمامه. اشتريته بأول مرتب ليا.
وغالبا بينجح انه يبسطنى
..ولما ده يفشل
..اتمشى لمسافه طويله وانا بسمع اغانى بحبها
.واستمتع بأى حاجة تمر عليا
بس لما ده كمان مينفعش
. بيقى اللحظة الواتيه لانى اطلع سلاحى
:)
. غوشتيين نحاس ... قيمتهم الماديه ولا تسوى
لكن ليهم قصه
. كنا فى رمضان 2008
كانت عمتى الساكنه فى بلاد العم سام موجودة فى مصر وقربت تسافر
وكان المطلوب منى انى انزل الحسين اشترى لاصحابها الاعزاء هدايا
. اشتريت اكثر مما طلبت
ولما كنت فى محطة العتبه ... شفت يابانيه ومعاها ولديين
وكان واضح انها هيا المسؤله عن كل حاجة . ماسكه الخريطة وكراسه صغيره
ولما حسيت انهم تايهيين .... شباك التذاكر هناك
. انتوا رايحيين فين اصلا
..ويا دينى على اللى شفتوا
. الست دى ..الكراسة اللى معاها ..كاتبه الحاجة باليابانى جنبها بالانجليوى جنبها بالعربى
جنبها حته خريطة مقطوعه
. ده احنا مش عايشيين يا جدع
. المهم كانوا رايحين مقياس النيل . المنيل
.وانا كنت مروحة ..كدة كدة فى طريقى .
وانا قولتلها ممكن اوصلكوا
الولديين ماشيين بيكلموا بعض ..واحد كان شعره غريب اوى ..زى بوب مارلى كدة
التانى شعره مش موجود
:). كلمتها قد ايه انا بحب اليابنيين ...شعب بضرب بيه المثل لما حد يقول على مصر مش هتقوم
. انهم انضرب عليهم قنابل نوويه وقاموا
. البنت كانت عسوله اوى ..وحبتها جدا
ومن محطة العتبه لحد الملك الصالح .واحنا بنرغى ..كلمتها على انها لو هتشترى كتب من سور الازبكيه تشترى منين
وتروح فين فى مر اماكن سياحية
وطبعا كله بالخريطة ...ده انا اكتشفت حاجات فى مصر ..مكنتش اعرفها اصلا
.ولما وصلنا محطة الملك الصالح وصلتها لحد مكان كويس كدة
ومهانش عليا انها تمشى كدة وخلاص
.ادتها هديه من اللى كنت جيباها معايا ..انا عامله حسابى واشتريت كذا حاجة زياده
. تعبير الدهشه الانبساط اللى كان على وشها بسطنى جدا
...سبتها مشيت .ثوانى ولقتها بتنده عليا .. وادتنى غوشتيين ... و بيديين مضمُتيين ...قالتلى شكرا
. ..وبما انى ابدوا كأنثى .. بس مش أنثى
انا مش بلبس الحاجات دى ابدا
لكنها اصبحت خط دفاع.. بلبسها ..علشان اسمع صوتها ..واقول لنفسى ..فى يوم عملت حاجة حلوة
مع واحدة غريبة ... فانبسط ..
مضطرتش البس الغوايش دى الا مرتيين ..لما وصلت حالتى لحاله مستعصيه
.ولبستها فى كلا المرتيين ...يوم واحد
...
انا لابسه الغوايش دى بقالى 3 ايام ... بتمشى فيهم كل يوم من الدقى للتحرير ...فى عز السقعه
.وباكل آيس كريم
. ده يديكوا انطباع عن حالتى حاليا
..
امبارح بعد ما مقتدرتش امسك نفسى ..وعيط شوية صغيريين جدا ...نظرا لانى فى مكان عمل .
واكلت آيس كريم واتمشيت لحد الاوبرا
.. وصلت حلوان 9 وربع
علشان الاقى موقف الميكروباسات ... كأسوأ ما يكون
ناس كتير..مفيش ميكروباسات ....
لحد ما اضطر الساعه 10 انى اركب واقفه
وده كان الوضع
...ضهرى للباب.. رجل فوق اسند جسمى...رجل تحت فى اتجاه مضاد وموازى له فى القوه .لجسمى
ايد سانده على الكرسى اللى جنب السواق ..وعليا ساند الراجل كتفه كأفضل ما يكون ..الايد التانيه مسنوده على كرسى
الاول ..وعليها كتف طنط .
راسى مكسورة علشان فى سقف
. و دايما وابدا فى ناس بتنزل فى الطريق ..وانا قولت يارب حد هينزل عند صالح صبحى
محدش نزل ...طيب ..عن الملف ...محدش نطق
...الملاهى.... كله ساكن فى كوالالامبور
المفارق طيب؟.. اسمع اصوات غريبة
..لحد ما اشوف بيتى فى الافق ....ياله يا ولاد الكلب
.. نزلت بعرج ..عايزة اصرخ
... لا تعليق ..بس
.
وانهاردة .. لابسه الغويشتيين
وهاكل آيس كريم
وهاتمشى
.
دى دفاعاتى . معرفش ليه مش جايبه نتيجه؟
الاكتئاب المرة دى قوى اوى
ولا انا اللى بقيت هشه اوى ؟
!

Jan 14, 2012

المترو :

عندى طقوس بحب اعملها
.زى انى اركب المترو ..اقعد لحد محطة طره البلد.يبقى كدة عدى ربع ساعه ..ااقوم لست كبيرة او ام بابنها
.ااقف عند الباب ..اسند ضهرى ..وعينى على الطريق ...
واتفرج على كل واى حاجة معديه فى الطريق
. انهاردة ومن حلوان المترو كان زحمة اوى
ومن قاصرها وقفت
.. لكن انى ااقف عند الباب ..ويجى بنات من محطة جامعه حلوان علشان يقعدوا على الارض ..ويخنقونى
ده كان فوق احتمالى ..ولاول مرة اتخانق مع الناس فى المترو
(هيا مش اول اول مرة يعنى ...اول مرة تبقى شخصيه ...انا اتخانقت كتير بس بيبقى سياسه او فكر
)
وبعديين لقيت 3 بنات نازليين دار السلام ..جيت على جنب كدهو علشان يعرفوا ينزلوا
.. وشديت تانى مع البنات دول ...قولتلهم فى ناس هتنزل وناس هتطلع ..المفروض نحس بالبشر اللى حوالينا
مش معدوميين الضمير وهيبقى الاخلاق كمان
.. كنت قربت ااقول شتايم قبيحه
.
بس الجميل بقى ..انى حتى وانا بسمع اغانى فى ودنى
كنت شايفه ال 3 بنات العساسيل بيتكلموا عنى
يعنى واضح اوى اللى بتوشوشها ..وبعديين تبصلى وتقولها ايوة اوى
:D :D

مفقوسيين اوى
..حسيت انهم ممكن يكونوا بيشبهوا عليا
. واحدة منهم اتشجعت ..وقالتلى ..انتى دكتورة؟
..هههههههههههه
ضحكتنى اوى بنت اللزينه
. قولتلها لأ .. ليه ؟
قالتلى اصل بالنضارة وكلامك مع البنات ..شكلك دكتورة اوى
.. قولتلها صدقينى ...انا ابعد ما اكون عن انى اكون دكتورة
.بس شكرا
:)
. الغريب انهم لما كنت بكلمهم كنت بفكر انهم اكيد فى كليه
واحدة راحت قايله من غير اى مقدمات
احنا فى اعدادى
:D
الذهول
.
لكن لما رجعت تانى للبنات وانا اهو لسه مهزقاهم
. لقيت ست بتقولهم ..يعنى عملتوا ثورة ياشباب علشان تعملوا كدة؟
اتضايقت اوى
.. لكن اتسعرت لما البنت ردت بكل دفاعيه
انا عمرى ما نزلت ولا كنت فى الثورة
..واصحابها ....ضحكه رقيعه
. نادتهم ... بس علشان اكلمهم ..واقولهم...
خليكوا قاعديين فى الارض يا حبيابى
.
يارب ما تحكم عليا ابدا .انى اكون فى مكان ..ولا لشخص
اسببله انزعاج. ويارب ورينى
وعرفنى واهيدنى انى امشى واسيب المكان مهما كان
.

..
بس

ضباب

عارف لما توصل لمرحله .انت مش فاهم انت مين؟
. ولا اصلا بتعمل ايه فى حياتك؟
ولا فين النجاح ؟
لكن النجاح الوحيد اللى بتقدر تعمله ...انك تقريبا بتخسر اى حد وكل حد حواليك
. مرة تقول ..انا صح .هما مش فاهميين
ومرات تقول ؟..الله ؟ هو فى ايه؟
كل دول مش فاهميين؟
طب ويعديين؟
.احساس الروح المعذبه ده صعب اوى
احساس انى مش عايزة اعيش ..اوحش بكتير
.اما احساس انى عايشة اهو وخلاص
واقفه ..ولا بحاول اصلح ولا بحاول افهم
. مش عارفه
وقفت تانى فى منطقة الضباب

مش شايفه .ولا فاهمه ولا عارفه رايحه فين ؟
.

Jan 13, 2012

انك تصحى انهاردة فى يوم سقعه مش طبيعى
.تكون فوت على نفسك خروجة انك تصلى الجمعه فى السيده زينب
علشان ..انشر الغسيل
اسيح الفريزر . واغسل المواعيين
.

. الدنيا حلوة
:)

Jan 12, 2012

12/1

غُرف ضلمه .... مستنيه هوا يعدى فيها
..مستنيه شوية نور ... مستنيه اكوام تراب يتشال منها
. مستنيه لمسه حنيه

حال قلبى

هولز ..ومناديل

يوميين على التوالى ...اشوف نفس الطفل
مرة كان بيبيع مناديل ..... عرض يا بيه ..عرض يا هانم .200 منديل ب 2 ج بدل 4 ج
....
ويوم .... هولز .يعطر الفم ويذهب الهم
...

اليوم الاول ..وعينه كانت بتتلفت حوله ... وخبىً الكيس اللى اطول منه ..وبيجره و كأنه بيجر المٍخله بتاعته
. علشان العسكرى ميشفهوش ... وبالرغم انى حاولت اشوف الولد وسط الناس ..ومقدرتش
كأنه كان لابس قناع مخفى
.. لكن شافه ..وقاله تعال ...تعـــــــــــــــال
. وبصوت مذعور حبتيين ... مهزوز شوية ..قاله معايا وصل
والله العظيم معايا وصل
.... ووقف مستنى افراج اِلاهى .وجه
على شكل اغلاق ابواب المترو
لكن على ما يبدو ان العسكر ى
مكانش عايز يسيبه ...فضل حاجز قفل الباب برجله ومهمته الوحيده على الارض يمسك الولد متلبسا
..... لكن صوت اُموى ...سيبه يا اينى اهو رزقه
.. شال رجله اللى كانت مانعه الباب انه يقفل ..
..الولد وشه احمر . خد رزقه
.. ووقف جنب الباب علشان ينزل
وفتح جيبه وخرج وصل لونه احمر ...فضلت اللقطة دى فى ذاكرتى طويلا
.
واقف من ضهره ...بيحاول بكل ما اُتى من قوه انه يخفى وشه فى الباب
وايد ماسكه المناديل ..وايد ماسكه الوصل الاحمر
وكأنه اخر ما له فى الحياه
......لكن اليوم التانى
.. كان معاه هولز...المرة دى العسكرى كان ...2
ومعاهم شخص شكله يخض اصلا
. والمرة دى شافوه قبل ما يركب المترو اصلا
..ومسبهوش
...ودى كانت اللقطة
..المترو قفل ابوباه ..ويغادر المحطة
..ومن الفراغات .... راجل كما يكون مازنجر ماسك الولد .
من رقبته ...الولد ماسك الهولز .. بيحاول انه ميقعش
..فى شخص تحرك لمساعدته .... مش الولد طبعا
. ومنعنى مغادرة المترو المحطة انى اشوف حصله ايه ؟
..

متأكدة انى هاشوفه بيبيع حاجة تانية المرة دى
.

انسى

انا بتغير
. دى حقيقه واقعه ..
لكن لو تقولى ايه اللحظة اللى اتغيرتى فيها ؟
.. ااقولك واضح ان دى كانت من زمان اوى
.لان الانسان بيتأثر بحاجات بتحصل وهيا بتغيره . لكن احيانا ميكونش عارف .ساعتها ان هيا دى اللى بتغيره
.انا مش فاهمه حاجة
المهم يعنى انى مش بعرف احط ايدى على النقطة اللى غيرتنى
لكن فى ..فى موقف غيرنى للابد
اللحظة اللى عرفت فيها اننا عايشيين فى غابه
اللحظة اللى عرفت فيها انى مش هارجع طفله تانيه ..ومش هنام واحلم بالدنيا الجميله
.لحظة اتاخدت فيها على قفايا ووشى ..وضرب مستمر .وبعدها بسنيين مكنتش ااقدر حتى افتكرها او احكى عنها
احكى هنا ؟. الحكى للهواء الطلق مريح
.
.....
عائلتى الكبيرة معقدة شوية ... لكن اليوم كان فى البلد
كان فرح بنت عمتى اللى المفروض انها اصغر منى بسنة او فى سنى تقريبا
.والمفروض ان كان الفرح ده فرصه لمحو الخلافات ..و اعاده وصل العلاقات الاسريه الحميمه
وقد كان ..كان فرح فى بلدنا ..كان غريب ..لكنه كان جميل بتجمع عائلى ضخم
..
واحنا مروحيين بقى ..
.....
انا كتبت الجمله دى وقعدت باصه لها اكتر من 5 ....6 دقايق
. وكل تفكيرى
.معتقدتش انى ااقدر احكى دلوقتى
... ولأ .. لازم احكى
.اامممم
.لأ مش هاحكى
. نأجلها لمرة تانيه
.

ببص على الكلام اللى مكتوب ده
.اتكتب يوم 12 /1 /2012
:)
.

Jan 11, 2012

11/1

انك تتمشى فى الجو التلج علشان يمكن جسمك يتعب شوية . فروحك تستريح شوية
..
انك تتمشى على كوبرى قصر النيل متخيل انك هتبقى لوحدك اللى هتستقبل الهوا المُعبأ .
بالشجن والقصص اللى تملى مجلدات وناس متعرفهاش
وكله جايلك من ناحيه النيل
..
لكن تلاقى الحبيبه ..وواقفيين برضه عند نفس العمود اللى من زمن مش كتير
شُنق واحد عليه ..واتنشر علشان يقدروا يشيلوا جسمه
قبل ما نبدأ نشيل اجساد واجسام و دماء
..
بحب العمود
. وبكره الحب الاعمى .. اللى مش عارف الألم

فينيسيا

كان عندنا مشروع رسم ..فى حديقه الازهر
قعدنا نرسم هناك اكتر من شهر
..ونظرا لانى شخص مجتهد
.كنت بنزل كل يوم ...اركب المترو لحد العتبه ...اتمشى لحد الجنينه
..ودى كانت مسافه طويله
او كاستثناء ..باركب العربية البيجو.
كنتى فين يا مدونة ساعه لما الحياه كانت كل يوم مغامرة ؟
المهم
.كنت بنزل لابسه جيبه سوده متعوده دايما على البهدله
.واى قميص عسول .لازم يكون متعود هو كمان على البهدله
ومعايا شنطة ضهر علشان البالته .والالوان
وشنطة على كتفى فيها المحفظة والموبايل . والوان برضه ..بس مكانش ينفع تترمى مع الرعاع ا
فى شنطة الضهر
.وفى ايدى استاند "ومن لا يعرف الاستاند ..هو الشىء اللى بيقف على حيله علشان تحط عليه اللوحة وانت بترسم وده لما بتكون خارج اطار الغرف المغلقه
:) و والله المفتوحة كمان "
والايد التانيه بتبقى اللوحة...ودى كانت فى ايام قليله ..لأنى فى الغالب بعتمد على طيبه قلب الشعب المصرى
وبحط اللوحات عندهم ..فى اى مكان برسم فيه بتلاقى حد قلبه يحن على شكلك المرهق فى العام ودائما
ويسمحلك انك تسيب اللوحة عنده
:)
. وانا بقى ايه ؟ كنت تلميذه مجتهده
كنت بنزل كل يوم كل يوم ..وايه الصحيان الصبح ..واقعد لحد 5 و6
...وكان بنسبه 65%من الدفعه
يااما بتصور ..وترسم فى بيتها
يا اما بتيجى تهرج ...ومش ترسم
.وكنت برسم فوق المطلوب ...يعنى دايما الدكتور يقول لوحتيين
ارسم انا 4 واحيانا 6
واسكتشات بقى ..هنا..وسرور
.
اليوم ده بقى
كان حالى زى ما قلتلكوا ...
نفس الجيبه السوده ...وقميص لونه بمبى ...واسع وفيه بقعه لون لونها اخضر .. على كتفى مكان الشنطة بالذات
و كنت بمزاج عالى ..اسمع منير ... لم اكن اعرف وقتها غيره
كنت مخلصه 3 لوحات من اصل 6 عايزة اخلصهم
من اصل 2 الدكتور طالبهم
.. وخرجت من محطه العتبه
لاجد المشهد ده
سائحه اجنبيه متوقفه عند السور ...بيتحاول تلاقى حاجة فى شنطتها
وفى ولد بيبع مناديل ..بيحاول بأى شكل انه يطلع منها بفلوس
.احنا متعوديين ...لكن نظرة الرعب الملتاعه على وشها لفتت انتباهى جدا
بالذات انها جت مع سرعه حركة ايديها فى الشنطة علشان تلاقى اللى كانت عيزاه
... قولت هاعمل اللى عليا
رحت للولد ..قولتله طالما قالتلك مش عايزة يبقى مش عايزة
..ومشى
...لقتها استريحت ..ابتدت عنيا تاخد شوية تفاصيل
شكلها شخص كبير ...ممكن تكون عدت ال 40 سنة
.عنيها بلون البحر...واللون ده المفضل عندى ..لو كنت اتمنى اى حاجة فيا تتغير
فكان هيبقى ده
.
المهم ..قولتلها اى مساعده ؟... طلع اللى كانت عايزة تطلعه من الشنطة...خريطة
. وشاورت على الكوبرى الاخضر .اللى عند الحسين
..قولتها طبعا ..انا ممكن اوصلك...وقررت انى مش هامشى بالروتيين بتاع كل يوم ..وهاشوف اخر المغامرة دى ايه ؟
.الكلام ده كان يوم تلات ..فى شهر 10
سنة .2008
وفى الطريق انى اوديها لعربية البيجو . لقتها فضوليه .زياده عن الطبيعى
.لان اى سائح بيكون عايز يوصل لفرجه وخلاص
لقتها بتسألنى عن احوال البنات فى مصر ؟..وعن احلامنا ؟
وهل فعلا بيجبرونا اننا نلبس الحجاب ؟وبيجبرونا اننا نتجوز حد معين
يعنى جايه بنفس الافكار الى مأخوذه عننا غلط
بس هيا كانت زى اللى لقى مصدر للتصريح ...يعنى حد من جوه البلد
كان فى شغف فى عنيها انها تسمع خلانى اتكلم معاها
ويا سبحان الله يامؤمن لما ربك يحب يوفق حد فى حاجة
انا تعليم مدارس خاصه صحيح
لكن انى اتكلم انجليزى بطلاقه ..مش عندى
الانجليزى بتاعى زى معظم الناس
..
ومن العربية البيجيو... للكوبرى الاخضر ..ونزلت معاها ..قولتلها انا ممكن اكون مرشدك السياحى وافرجكك على حاجات حلوة ؟
ولما وافقت كنت مبسوطة اوى ..بالزات انى ابتديت احبها
وانا بابا من زمان مفهمنى ومربينى انهم ميختلفوش عننا فى حاجة ..وانهم فى الغالب هيكونوا بيحتقروكى ..
يعنى مش عندى عقده الخواجة ولله الحمد
... اخدنا شارع المعز تقريبا كله لحد جامع الحاكم بأمر الله
..وفى الطريق ميمنعش انى ادخلها مسجد ..مش موجود فى الاماكن السياحية المعتاده
.. وكنت مبسوطة اوى من ردود افاعالها..زى انها تقول ان المسجد بيتميز بهدوء نفسى
وان حتى الزخرفه اللى على الاعمده مميزة جدا
وانا قعدت اكلمها من ناحية فنيه عن حاجات كتير
ووقتها سألتنى عن احلامى ...اتكلمت كلام ...يا ابويا ...مش عارفه جبته منين
ولا كأنى كنت عارفه الست دى عمرى كله
:)
حتى انى دخلته الحوارى اللى ورا
اللى ورا بيت السحيمى ..الدرب الاصفر والحتت دى
انبساطها هو اللى كان بيشجعنى
المهم اننا عقبال ما وصلنا لمسجد الحاكم بأمر الله ..كان العصر اذن
واحنا كنا فى العتبه على 11 الصبح ولا حاجه
... دخلنا مسجد الحاكم ...وطبعا هو مميز جدا بالرغم من قله زائريه
.والحمام اللى بيفضل يدور فى المكان
كانت اول فرصه اننا نلتقط انفاسنا
.. وكانت اول مرة من بدايه اليوم نقعد كدهو
... صليت العصر ...وكانت هيا استريحت شوية ...طلعت حاجات من الشنطة بتاعتها
... ولما قعدت جنبها استريح انا كمان ...كانت مطلعه الكاميرا ....اتصورنا
وانا طلعت كاميرتى -كانت ديجيتال قبل ما اشترى الكانون -واتصورنا
ووقتها لما قلتلها انى اوصلها لحد الحسين تكمل اللى كانت عيزاه
...فكرت ..ما اجيبها حديقه الازهر ؟مكان حلو واكيد مكانتش هتروحه لوحدها
عرضت عليها ..وقولتلها انى اعرفها على اصحابى ..واقفت على طول
:) وخدناها للحديقه مشى
... كان تقريبا بقالنا بنمشى اكتر من 3 او 4 ساعات
...كانت اول مرة فى حياتى اقعد كل الوقت ده اتكلم انجليزى
ولما وصلنا الجنينه
.ودخلنا ... شافت لوحاتى اللى كنت عيناها مع حد فى الحديقه
...... و قالت انها بس محتاجة تشرب سيجارة..قولتلها مفيش مشاكل
. شاورت ليها على المكان اللى هاكون قاعده برسم فيه .
و قالت انها هتشرب السيجارة وتيجى على طول
.......

.
لكن كان قدرى .انى اكون لحظة عابرة فى حياه فينيسيا
.

و كان هدفى الوحيد ..انى اغير فكر حتى ولو واحد .عننا
كلمتها عن احلامنا .عن آمالنا .. عن واقعنا
عن حقيقه مخفيه فى شعب عظيم .
وكان تخيلى .ا ن الدايرة الصغيره ممكن توسع وتوسع
..
فضلت مده طويله مش بحكى لحد خالص عن اليوم ده
. كنت فخورة بنفسى - ودى حاجة نادرة جدا الحدوث- وكنت عايزة احتفظ بذكرى اليوم ده ليا لوحدى
ومحدش يشاركنى
.
لكن بعد اكتر من 10 شهور على اليوم ده
الصورة ضاعت
.

Jan 9, 2012

9/1

فى كلام كتير اوى محبوس جوايا
مش عارفه ايه اللى حصل ؟او خلى اليوم ده مختلف انى واذ فجأتن بتكلم وبقول كتير
انا كنت لسه فى صدمه محمد محمود
.. كان عندى صدمه الا فعل ..مش عايزة اعمل حاجة ولا ااقول حاجه
.. وعادى ..ادينى عايشة
.
.. المهم فى كذا مشاهده عايزة احكى عنها
..
حكايه الستتات المنتقبات ..اللى بشوفهم فى المترو وكل مكان
.. بحسهم محبوسيين .. وده احساس منى انا ..واكيد ليه دلاله على شخصيتى
.يعنى البنت المنتقبه اللى كانت فى المترو وبتقرأ ل د فيل
.. بغض النظر عن كرهى للراجل ده .. بس حسيت انها بطريقه ما عايزة تتحرر
.وانهاردة فى المترو شفت ست منتقبه بتاكل لب
.حسيت انها مش طايقه نفسها ..طبعا انا كان ممكن اشوفها ان النقاب ممنعهاش انها تعمل اللى هيا عيزاه
.معرفش
ده اللى بشوفه
...
حاج تانيه
.
فى الفن ميدان ..وواضح المجهود راسميين بنات ثوريين .
سايبيين تحت كل رسمه ورقه علشان تكتب رأيك
.. تخيلوا ان اللى كتب رأيه اول واحد .... كتبه فى نص الصفحه .. مش علشان رغاي ...علشان كتب بخط كبير
وبغض النظر انه كان شتيمه ...بس لفت نظرى انه حتى مش عايز يسيب مكان لأى حد هيكتب بعده
ليه ؟
يعنى مش بتحترم أراء الناس
ولا حتى تسيبهم يعبروا عنها ؟
هل ياترى احنا بنعمل مع بعض زى ما النظام كان بيعمل فينا
؟
رأيى انا او لأ؟
قلبى اتقبض اوى وانا بتفرج على كل لوحة ...وكل ورقه تحتها كان نفس التصرف
يعنى ده حتى الفكر البشرى الطبيعى .بيقول تتكلم شوية ..وتسمع شوية
كنت دايما اهزر مع اختى ان ربنا خلقلنا ودنيين اتنيين علشان نسمع اكتر
.
هل ياترى هاعيش لليوم .اللى الاقى الناس بتسيب المجال للأراء المختلفه وتحترمها حتى لو ضدها ؟
.
موقف تانى
فى المترو ... واحساس ست بالتأفف من واحدة شكلها غلبانه وعلى قدها
لما فكرت شوية ..
هو مش كان ممكن هيا تكون مكانها ؟
التأفف ده علشان مش على مزاجها ؟مش الشكل اللى اتعوددت انها تشوفه ؟
ولا علشان شيفاها ااقل منها ؟
بس للحظة حسيته خوف
.. خوف وحسد كمان
.لأن الست دى كانت مبتسمة ...
مكنتش ممكن تاخد بالك ان الجزمة مقطوعه ..والجلابيه مهلهله
بس ابتسامه جميله جدا مزينه وشها
:)
. كان نفسى اروح لطنط ااقولها
تدفعى كام علشان يبقى عندك راحه بال
واختيار انك تعيشى بابتسامه كدة ؟
:)

Jan 8, 2012

هرتله..الفن ميدان

الروتين والملل المسيطر على الحياه ..هيقتلنى
.. بصحى علشان اروح الشغل ... واخلص شغل علشان اروح انام ... بس علشان اصحى تانى يوم
:(.. سىء محزن انى ابقى مليانه على آخرى ..ونفسى افجر ده
رسمه كانت او صورة
.بس انا اتغيرت
..مش عارفه ايه اللى حصل ؟بس حاسه نفسى اتغيرت
.. ومش عارفه اتأقلم مع نفسى الجديدة
..مش عارفه الاقى المزاج بتاعى اللى كان بيخلينى ارسم واصور
.. واللى كان بيخلينى نشيطة .. ومنتجه
ايه اللى حصل؟
..
انا كنت هاحكى على حاجة
.. امبارح كانت فرصه انى اخرج خارج الملل بتاع حياتى ده
كان الفن ميدان
.. بخلص شغلى انا الساعه 8
كنت هناك 8 وربع تقريبا
. و عرفت ان اسكندريلا هيغنوا من 8 ونص
قلت كويس ..ااقدر اقعدد لحد 9 ..او حتى 9 ونص
.. وبتوتر كحالتى الطبيعيه انى اقعد احسب كل حاجة
لازم امشى على 9 ونص ..علشان اوصل حلوان 10 وربع ..يبقى يا دوبك
اشترى الحاجت اللى ماما عيزاها ..والحق اروح البيت على 11
وطبعا لازم اعتذر لبابا وهو بيقولى يا بنتى احنا بقيينا فى شتا ..مينفعش المواعيد دى
.
.لكن اسكندريلا قعدوا وقت طويل على المسرح .زمش بيعملوا حاجة
بسبب ان الميكرفونات بايظة
وانا اقعد افكر .يعنى حفله مهمه كدة وميبقوش مستعديين ازاى يعنى ؟
. المهم انى قعد ت ااخر ميعادى علشان الحق حتى اول اغنيه بس
.. ومع بدايه اول اغنيه
جالى احساس ..انى مش مستمتعه خالص
. انا اعصابى باظت ..والمفروض انى اكون روحت من نص ساعه
وبمجرد ما قولت انا خلاص مروحه ...ومشيت مش ااكتر من 100 متر
جالى اصوات الاستهجان
الصوت راح
:)...
لكن اللى ضايقنى من نفسى اوى
ان فى اللحظة دى ..وانا بحس بانخفاض درجة الحرارة ..وشفت على الارض نقط ابتدت تتجمع
:) ..الدنيا كانت بتمطر
... لكن انا مشيت ودخلت المترو علشان الحق اروح
:(...
مش كان ممكن امشيها لحد مترو السادات ؟
وانا كل ده اللى بفكر فيه وانا ماشية فى المترو
.بقى عندى هدف
... يمكن لما اتجوز بقى ولا حاجة
انى انزل وسط البلد ..وتبقى الساعه 5 ..والجو ساقعه
وياريت تبقى الدنيا بتمطر كمان .. واتمشى واتمشى
:D
مكنتش عايزة انهى البوسط . بحاجة كئيبة
لكن وانا فى المترو
وتحديدا فى محطة الملك الصالح
وبمجرد ما المترو بدأ فى سيره
جرى ولد جنب الرصيف ..وخطف موبايل من ايد واحدة جنب الشباك
...لم يألمنى نظرتها الملتاعه
اكتر مما آلمنى ...
خدشه ايده على خدها
..
.

Jan 7, 2012

حسنه...ودمعه

عموما ..ودايما
انا ببص على الناس ..مش عارفه بدور على ايه ؟
. بس متخيله ان اكتر حاجة غنيه فى الدنيا هو الانسان
..ممكن تشوف 4 او 5 تعبيرات على وش شخص فى ااقل من ساعه
..
لكن البنت دى كانت مميزة
مش عارفه ليه ؟.. كانت من البنات اللى مش باهره الجمال لكن جذابه جدا
.. وبسيطة فى لبسها ومكياجها .
..لكن كان عندها اغرب حسنه ممكن اشوفها
.. كانت تحت عنيها بمسافه صغيره .. و مكانتش مجرد نقطه..كانت واخده شكل بيضاوى شوية
..كان شكلها غريب اوى
لكن الاغرب ..انها مع حاله الحزن اللى البنت فيها ..وهيا باصه على شباك المترو ...ونظرها مش جايب حتى الحديد
. الحسنه دى كانت دمعه
.. قعدت افكر شوية ..ايه اللى مزعلها ؟.. هل حركة ايديها ولعب صوابعها بالدبله ..ليه دلاله ؟
..
وفى لحظة تليفونها رن ...وهيا بترد .كانت مبتسمة
بس ده خلى الدمعه تقرب من عنيها اكتر
.. خلاها جايه من المنبع
.مقتدرتش افكر كتير فى مشاكلها
لكن افتكرت فكرة كنت بحب اعملها ايام مما كنت فى الكليه ..كانت بتهون عليا شوية
..كنت ااقعد ابص على الناس حواليا
..وكنت بتخيل ان كل دول اكيد عندهم مشاكل وصعاب فى حياتهم
..انا ابسط البسيط .
كنت دايما اروح البيت ..مش متضايقه على الاقل
واقول الحمد لله
:)..
. البنت دى نزلت فى محطه دار السلام ...شفت دمعتها من بعيد .
مكانتش سودة دى
.كانت حقيقيه
. شكل احزان القلب مش بتقدر تفضل محبوسة كتير
.لازم تطلع بشكل او بأخر
.

Jan 5, 2012

مريم

هما كانوا 6... بعديين بقوا5 قبل ما اتولد
.. ودلوقتى بقوا 4بس
..اتكلم عن عماتى
..ااقرب عمتو توفت من يجيى 5 شهور
.. كانت مريضه جدا ..وعمرى ما هنسى عين بابا اللى كانت بتطل عليا كل ما اشوفها
لحد ما كانت عيانه جدا .. ولحد دلوقتى بتمنى انى ياريتنى ما كنت شفتها كدة
لأنى كل ما افتكرها افتكر لحظة عيا
.. احساس التقصير فى حقها كان فظيع
بالذات انها كانت فى البلد مكناش بشوفها كتير
.بس البوست ده مش علشان اتكلم عن عمتو
ده عن حفيدتها ...بنت عمتو اصلا اصغر منى بسنه
.. لكن اتجوزن من يجيى 5 سنيين
..سلو بلدنا كدة..انا بالنسبه ليهم مش بس معنسه ..بس فقدوا الامل كمان
:)
..
بنت عمتى خلفت ولد الاول ..سمته حسام...وبعديين جابت بنت ...سمتها مريم
مريم كانت مولوده بعيوب خلقيه
.كنت تشوفها تحس ان معندهاش عضم اصلا
.وكان شعرها مبيطلعش .
بس كانت عنيها كبيرة وصافيه ..
..معامله بنت عمتى قاسيه جدا
..اصلا فى البلد ..الناس علشان بتتعامل مع الارض..مش بيعترفوا بالضعف البسرى ..
كان بابا دايما يقولى..انتى فاكرة ان الارض تفهم يعنى ايه احباط؟
الارض يهمها انها تتروى كل يوم ..ان شاءالله تكون شبح
..مفيش حاجة اسمها ضعف بشرى ولا احباط ولا اكتئاب
..
هل معامله بنت عمتى القاسية دى كانت علشان طريقه التربية المختلفه اصلا؟
..مش عارفه .بس المرات القليله جدا اللى شفت مريم فيها .
كانت معامله مامتها معاها بتذهلنى ..لدرجة انها ممكن تعملى صدمة عصبية
بنت تعبانه ..مش بتقدر تزحف ولا تتكلم ..
.. وزى ما قلت ..تقول ان معندهاش عضم
.. كانت الضعف البشرى والعجز متجسد
.. لما كنت بنجح انى اضحكها ..كنت بحس بسعاده تملى الدنيا
و حاجة مش هنساها
.ان مامتها تزعلقها على حاجة قمه فى التفاهه
وهيا مش واخدة بالها ان ايديها مرميه وراها ..هيا مش قادرة تحركها ..واديها ابتدت توجعها
. لكن مفيش .فضلت تزعقلها .. على حاجة مش ذنبها .
ولما حاولت انى اهون عليها واديها حاجة حلوة ...هيا مش عايزة ..هيا عايزة بس ايديها اللى بتوجعها ..تبقى كويسة
.. ولما بتفضل تعلق على كلمه لأ
مش بتقول حاجة تانيه ..تفضل تقول لأ
.لألألألألأ
كنت ببقى مبسوطة اوى .ان فى حد اهو قادر يتمسك انه يقول لأ
لان دى ممكن تكون مشكله عويصه عندى
.اللى بيطلب حاجة بقوله حاضر ...ومش بقدر ااقول لأ
كنت بتمرن ايام انى ااقف قدام المرياا..واقعد ااقول
لأ
لأ ..
..لكن مامتها كانت تعتقد ان دى قله تربيه ..كانت تعاقبها
:(
لكن اليوم اللى كان معايا الكاميرا الصغيريه بتاعتى ..وكنت عايزة اصورها وهيا مرضيتش
..هيفضل وجع القلب .... يوحعنى
..
مريم ماتت
ماتت بعد ما اخدت صدمه وتقريبا كنت عايزة ازعق فى ماما
لما بنت عمتى التانيه حلمت بعمتى اللى لسه ميته .ومعاها مريم..كان تفسير ماما للحلم
انها هتموت
..وماما قالت يارب تموت ...وانا بعيون مذهوله ومفتوحة على الاخر
ماما متقوليش كدة
:(... قالتلى ده اريح ليها ولأمها

.مكانش هاممنى امها خالص
. وعارفه انها استريحت
. ربنا يرحمها .

وفى الاخر .الجمله
.ان .الموت لا يؤلم الموتى لكنه يؤلم الاحياء ..
بتتأكدلى كل يوم عن التانى

.
. ربنا يصبرنا على دى حياه

Jan 1, 2012

مش بوست

بتطمن اوى ةبحس بدفا لما ابتسم لطفل فى اى مكان ويبتسم ليا تانى
.. اعتقاد راسخ عندى من زمان .ان الاطفال فيهم حاجة ملائكية ....ربانيه
لما بيبتسم او بيستريح لحد
ده معناه ان لسه جواك حاجة بيضا
حاجة حلوة...شافها الطفل
وابتسملها
.. يمكن علشان كدة بحاول احافظ دايما على الطفله جوايا
مش عايزة افقدها ابدا
دى اللى بتفكرنى انى لسه انسانه
ان مش لازم الحياه تتحول لغابه وصراع
انى ممكن ابتسم فى عز ما انا متضايقه
انى مش لازم انتقم من كل حد مضايقنى
انى اصحك بصوت عالى وقت ما احب
انى اركب المترو واحب اقعد جنب الشباك
لو انى بكل مرة ضحك فى وشى طفل ..صغرت سنة
:)..فانا كدة مبسوطة
..
بقول ده ليه بقى ؟..
علشان .انا حاسه ان الدنيا بتحطنى فى مواقف واماكن
انى غصبن عنى اكبر
. واواجه ..وانى لازم اكون قوية ..واخد القرار
..ماشى..انا ده كله
بس سيبوا الطفله اللى جوايا شوية
:(
مش عايزة اكبر دلوقتى
..
مش عارفه قلت ده ليه ؟
كان فى حاجة عايزة احكيها ...

.
البوست دهعن حاجة عايزة احكيها بس مش فكراها
:)
افتكرها واقول على طول