وصيتى

دى وصيتى

.انا هبه حازم الخولى

..

اوعو اتكون جنازتى محزنة.... ومش عايزة عياط تمثيل.... كدة هتقرف وانا فى قبرى .

اللى هيفتقدنى يزعل فى نفسه ...مش لازم يقول للناس يعنى

... فى الجنازة ...حطوا احلى صورة ليا ..وزعوا آيس كريم للناس

...هاتول مصور كويس واتصوروا كلكوا مع بعض

.. استغلوها فرصه انكوا متجمعيين

.

عنيا ادوها لحد يقدر نعمه النظر..ياريت يكون من مصابى الثورة ...ويبص بيها على السما والشجر ..ويستمتع بانه بيشوف

.

قلبى.. اوعوا تدوه لحد كئيب....هيموت فيه .. ا دوه لحد بيحب الحياه.

واى حته فى جسمى حد محتاجها ... اتبرعوا بيها

..

نيجى بقا للمهم.

لوحاتى... ادوها للناس فى العشوئيات يعملوا منها سقف

.

ولو بعتوا اى لوحه...لان الفنانيين الميتيين ليهم صيت كدة..وبيبيعوا اللوحات بفلوس حلوة

. لو بعتوا اى حاجة يعنى... كل الفلوس تتبرعوا بيها لمدرسة فى المناطق الفقيرة

.ويكون احسن لو تكفلتوا بتعليم ولد صغير منسى .

..

الكتب بتاعتى..اوعوا تبيعوها بالكيلو كدة..اتقهر فى قبرى

..

كل واحد منكوا ياخد الكتاب اللى يحبه

الكتب بتاعتى انا بكتب في اول صفحه التاريخ وكلمه

.. اكتبوا انتوا حاجة وحطوها فى مكتبتكوا

..واقرأوها..

كل واحد ياخد كتاب واحد...واللى يتبقى ...حطوه فى مكتبه فى منطقه مفيهاش مكتبه ..ولو اطفال عايزيين ياخدوها.اديهالهم بشرط انهم بعد ما يخلصوها يدوها لحد تانى

الكاميرا بتاعتى بقى....اهم حاجة انكوا تحافظوا عليها..ادوها كل 6 شهور لحد يستفيد منها ... ويصور ...وياريت تدوها لحد بيسافر افريقيا او ايطاليا .

...على الاقل تكون الكاميرا بتاعتى سافرت .

...مفيش حاجات كتيرة...اتأسفوا لأى حد اتضايق منى

قولوا لماما .. انى حاولت ..والله العظيم حاولت . بس مش ذنبى كل اللى حصل..ومش ذنبى عقلى وتفكيرى

...

عارفه انى هاقابل ربنا بانى حاولت ...

..وربنا يسامحنى بقى

........اتمنى انكوا لما تيجوا تتكلموا عنى ... افتكروا انى كنت بحب الشجر.. بحب السفر

. بحب الآيس كريم .

...واهم حاجة اهم حاجة

....اياكوا تسيبوا ناس مش عارفانى تتكلم كأنها عارفانى

...اللى يعرفونى يتعدوا على صوابع الايد

...وقولوا لكل اللى ضايقنى فى حياتى....انا ميته مسامحه كل الناس

.وقولوا لسفانه اختى...انتى من اكتر الناس اللى اتمنى اديها عمرى كله

.. وانا اسفه . .. بس